Министерството за надворешни работи на Република Северна Македонија денеска ќе одржи панел дискусија за ПФД2023 насловена „Патот кон 2030″.
Панел дискусијата ќе претставува воведен настан на третото издание на ПФД2023 и ќе се одржи на 08 мај 2023 година во Амфитеатарот на Министерството за надворешни работи.
„Процесот на проширување на ЕУ, од гледиште на земјите кандидати за членство во ЕУ и земјите коишто се веќе во пристапната фаза, во последно време забележи одредени исчекори. Северна Македонија и Албанија ги почнаа пристапните преговори, додека Босна и Херцеговина, Украина и Молдавија добија кандидатски статус. Меѓутоа, и покрај овие позитивни придвижувања, се уште се присутни пречки на трнливиот пат до Брисел.
Во овие сложени и непредвидливи околности, Министерството за надворешни работи на Северна Македонија го подготвува третото издание на Преспанскиот форум за дијалог 2023 (ПФД2023), насловено „Проширено европско семејство до 2030 година: (не)возможна мисија?“, коешто ќе се одржи на 15 и 16 јуни 2023 година во Струга, живописен град на брегот на Охридското езеро.
Согласно воспоставената традиција и како предвесник на ПФД2023, Министерството за надворешни работи организира пред-настан насловен “Патот кон 2030“ којшто има за цел размена на аналитички размислувања и идеи коишто би послужиле како важен придонес за дискусиите на сесиите и панелите на ПФД2023/
Имајќи ги предвид глобалните и регионалните предизвици со коишто се соочуваме, би сакале дискусиите на овој пред-настан да се фокусираат на способноста на ЕУ да дејствува како глобален стратешки чинител со, меѓу другото, и завршување на процесот на интеграција во ЕУ. Една од најважните грижи на граѓаните на Западниот Балкан е зачленувањето во ЕУ. Најголем дел од граѓаните посочуваат дека процесот е предолг и прилично неправеден, при што искажуваат и сомнежи во кредибилитетот на ЕУ и нејзините неисполнети ветувања. Јавната поддршка за интеграцијата во ЕУ драстично е намалена.
Би можеле ли сите заедно, после 20 години од Солунскиот самит, да ја промениме парадигмата на процесот на проширување и неопходноста од стратешко будење со тоа што ќе ја поставиме 2030 година за заедничка цел за пристап во ЕУ? А, во меѓувреме и во функција на потребата од конкретни и оперативни чекори насочени кон забрзување на ЕУ интеграцијата на регионот со фокус на неговиот социјално-економскиот раст – односно повеќе интеграција пред членството во ЕУ – кои кредибилни чекори кон забрзување и постепено проширување на евро-интегративниот процес би можеле да бидат преземени?
Имајќи ја предвид новата француско-германска иницијатива за реформа на ЕУ, каково влијание истата би можела да има во делот на политиката за проширување, особено ако се има предвид дека оваа политика зависи од волјата на едногласноста? Во колкава мерка проширеното европско семејство до 2023 би можело да придонесе кон зајакнувањето на трансатлантската безбедност и обликувањето на новиот евроатлантски безбедносен систем?“, се вели во најавата на настанот.
