Мицкоски не бара дебата, рече премиерот Димитар Ковачевски во „Само интервју“, одговарајќи на барањето за дуел на претседателот на ВМРО-ДПМНЕ, Христијан Мицкоски.
„За коридорите 8 и 10д и Договорот со Бехтел и Енка две недели не сакаа да закажат дебата во Комисија. Претходно бараа дебата за уставните измени, а не прифатија да учествуваат во работната група. Беа поканети при преговорите за започнување на преговорите за членство, но не учествуваа во преговорите. Имавме и почеток на преговорите со ЕУ, опозицијата одби да се приклучи, а можеше да ги каже своите ставови, беа поканети“, кажа премиерот.
Според него, единствена цел на Мицкоски е блокирање на сите процеси во државата и додаде дека се блокирани половина милијарда пари за граѓаните во Собранието, како и закони за солидарност.
„Дуел ќе има, кога ќе дојде време за тоа. Ние имаме институции во коишто треба да се води дебата, не може институционалната дебата да ја заменуваме со лидерски средби и дуели по телевизии. Автопати не се прават по лидерски средби. Ги повикувам претставниците на опозицијата, ако им дозволи Димитар Апасиев да се приклучат кон процесите што значат унапредување на животот на граѓаните“, порача Ковачевски.
