„Неспособноста на ВМРО-ДПМНЕ и Данела Арсовска е единствената причина за хаосот што му се случува на Град Скопје. ВМРО-ДПМНЕ го има мнозинството во Советот, го има мнозинството од членовите на управните одбори во јавните претпријатија и установи кои исто како Градот се едвај функционални“, соопшти на прес Дарко Каевски, пратеник и портпарол на СДСМ.
„Токму ВМРО-ДПМНЕ и шпицниот градоначалник Христијан Мицкоски ја промовираа Арсовска како најдобра менаџерка, бараа доверба од граѓаните и заедно ја славеа изборната победа во Белиот дворец.
Денес, една и пол година, Градот е со блокирана сметка и е пред банкрот.
Во Скопје со месеци се случува хаос со јавниот превоз, а сообраќајот е колабиран особено по затворањето на мостот „Беласица“, проблем што мнозинството од ВМРО-ДПМНЕ и Арсовска целосно го игнорираат.
Над сто милиони евра народни пари потрошија ВМРО-ДПМНЕ и Арсовска, не се реализираше ниту еден капитален проект а Градот и јавните претпријатија тонат во долгови.
Со таков однос не е далеку денот кога Скопје и официјално ќе банкротира што е невидена катастрофа.
Банкрот на градот ќе значи целосен колапс на јавните претпријатија, целосен колапс на градската администрација. Ете што се случува кога ВМРО-ДПМНЕ добива шанса да управува со парите на граѓаните.
Наместо проекти и решенија има масовна партизација, кавги за тендери и провизии и расипничко трошење на буџетските средства. Скопје и скопјани не заслужуваат ваква расипничка и неспособна градска власт“, истакна Каевски.
