„На Охрид му треба современ булеварски влез и поврзување со Подмоље, Но најважно е да биде безбеден за сообраќајот. Ако сакаме тоа да се направи така мора да имаме малку трпение и да дозволиме изведувачите на тоа поврзување да го прават непречено, стручно, квалитетно, но и брзо како би можело за Петровден, односно отворањето на Охридско Лето кога и официјално започнува туристичката сезона истиот тој биде пуштен во употрева“, објави на Фејсбук, пратеничката Жаклина Лазаревска.
Да не дозволиме да се случи како ланската сезона кога во шпиц на туристичката сезона Центарот на Охрид, улицата Македонски Просветители беше целисно раскопана, недовршена и во прашина, вели Лазаревска.
Таа нагласува дека стариот алтернативен пат е во добра кондиција и е реконструиран пред неколку години.
„Што се однесува до алтернативното пренасочување на сообраќајот од Подмоље до Охрид по стариот пат. Патот е во добра кондиција, реконструиран пред неколку години со пари на ЈПДП односно државата и овозможува непреченост и безбедност во сообраќајот. Дали од Подмоље до Охрид ќе се вози 5 или 10 минути повеќе важно е да биде безбедно и по пристоен пат на кој асфалтот е нов и нема никакви оштетувања“, вели Лазаревска.
Лазаревска потсетува дека „пред 2 години исто така беше направен современ влез од другата страна , на влезот од Лескоец за Охрид на улицата 15 Корпус со средства на централната власт и општина тогаш предводена од градоначалникот од СДСМ“.
„Влезовите во Охрид мора да бидат онака како што доликува за еден важен туристички центар, бисер на Балканот. Владата предводена од СДСМ била и ќе биде најголемиот финансиер за развој на општина Охрид“, вели Лазаревска.
Градоначалникот на Охрид, Кирил Пецаков, бара да се одложат до септември градежните зафати на потегот Подмоље – Охрид. Смета дека затворањето на главниот пристап кон градот ќе му нанесе сериозен удар на туризмот.
Ј. Ѓ.
