Владин тим предводен од грчкиот премиер Кирјакос Мицотакис утре ќе замине во Стразбур на средба со претседателката на Европската Комисија Урсула фон дер Лајен за, како што вчера соопшти самиот Мицотакис, да разговараат „за начинот на кој Европа ќе ја поддржи Грција и да добие значителна финансиска поддршка за соочување со големата катастрофа“, јави дописничката на МИА од Атина.
Грчкиот премиер вчера одржа состанок во Координативниот центар за операции во периферијата Тесалија погодена од поплавите, соопшти мерки за поддршка на погодените, но и истакна дека постојат многу опции за финансиски средства преку кои Европа може да помогне.
Посочи дека за сето тоа ќе разговара со претседателката на ЕК и изрази сигурност дека „Европа финансиски ќе ја поддржи земјата за да не мора грчките даночни обврзници сами да ги сносат големите трошоци за санирање на штетите што ги остави зад себе невремето“.
-Сакам да знаат сите наши сограѓани чии имоти се или уништени или претрпеа големи штети, дека државата ќе ги поддржи и тоа брзо, за да можат повторно да влезат во нивните домови со потребната финансиска поддршка за покривање на потребите од опрема за домаќинството, а подоцна и со оние средства кои се неопходни за санирање на штетите што ги остави зад себе поплавата, рече Мицотакис.
Додаде дека поддршката ќе се однесува и на земјоделците и на земјоделските производи, додека пак за оние кои останаа далеку од нивните домови, предвидена е и психолошка поддршка.
Во поплавите во Грција предизвикани од невремето „Даниел“, досега, животот го загубија 15 лица, а двајца се исчезнати.
