Денеска и утре во шпанскиот град Мурсија ќе се одржи неформален министерски состанок на ЕУ за општи работи и кохезивна политика, на кој ќе се разговара за проширувањето на Унијата, како и за прашања поврзани со концептот „Отворена стратешка автономија“ (ОСА) и со Кохезивната политика на блокот по 2027 година, соопшти Шпанското претседателство со ЕУ.
На денешниот прв ден од средбата, фокус ќе биде ставен на дискусиите за потребата од внатрешна подготовка на ЕУ за функционирање со најмногу 36 членки, која во исто време ќе биде способна да ја зајакне поддршката за идните земји кандидати за членство, за остатокот од светот и за трети држави.
Прашањето за проширувањето ќе биде тема на работните маси, со кои ќе претседава еврокомесарот за проширување и соседска политика Оливер Вархеји, посветени на влијанието на проширувањето врз политиките на ЕУ, на концептот на постепена интеграција, односно приближување на земјите кандидати за членство до Унијата уште за време на процесот на пристапни преговори, како и за институционалните прашања што треба да се променат со цел блокот да се направи погоден за функционирање во иднина.
Проширувањето на ЕУ и концептот „Отворена стратешка автономија“ (ОСА) се меѓу главните теми во разговорите за подготовката на новата Стратешка агенда на ЕУ, која би требало да биде усвоена во текот на претседавањето на Белгија со Унијата во првата половина на 2024 година.
За време на денешниот работен ручек министрите ќе се фокусираат на подготовката на состанокот на Европската политичка заедница на 5 октомври и на неформалниот Самит на ЕУ на 6 октомври, што ќе се одржат во шпанскиот град Гранада, на кој едни и од централните теми исто така ќе бидат проширувањето и концептот ОСА.
Пред учесниците на состанокот во Мурсија, Шпанското претседателство ќе го презентира и извештајот „Отпорна ЕУ 2030 – Отпорна Европа во 2030“, како основа за размислување за дискусијата на средбата на шефовите на држави или влади на Унијата во Гранада, од аспект на прогресивниот пристап за зајакнување на отворената стратешка автономија и глобалното лидерство на блокот.
Во текот на утрешниот ден министерскиот состанок ќе продолжи со расправа за кохезивната политика на ЕУ по 2027 година, кога започнува и новата финансиска рамка на Унијата.
Шпанското претседателство со ЕУ пред министрите ќе презентира анализа за новата кохезивна политика на блокот, наречена „Кохезија 2.0“, што содржи преглед на резултатите и научените лекции од тековната Кохезивна политика, која сега функционира заедно со Механизмот за обнова и отпорност (РРФ), како клучни елементи за развој и изградба на интегрираната Унија.
Целта на анализата е новата политика на кохезија на ЕУ да може да одговори на предизвиците што претстојат пред Унијата, како зајакнување и обезбедување на избалансиран и хармоничен регионален раст, унапредување на конзистентноста и кохерентноста меѓу регионалните и националните цели и поттикнување на територијалната соработка.
Според Шпанското претседателство, со „Кохезија 2.0“ треба да се обезбеди зајакната соработка меѓу земјите членки и регионите, насочена кон реализација на проекти кои произлегуваат од нивната специфична реалност.
