Претставникот на новоформираното Национално движење на Србија за Косово, Жарко Ристиќ ги повика Србите од Косово „да се свртат и да ги отфрлат лажните политички власти од Белград“ кои, според него, „ги предаваат Србите од Косово и ги даваат на косовската полиција како на тацна“, јави дописникот на МИА од Приштина.
Во денешното соопштение доставено до медиумите, кое го пренесе порталот „КоССев“ Ристиќ ги окарактеризира настаните од 24 септември во Бањска кај Звечане во северно Косово, каде што беше убиен еден косовски полицаец и тројца од групата Срби, кои извршија напад врз полицијата, како „последна епизода од предавството на Србите“.
– Српската Влада служи за предавство, ропство и кражба на сопствениот народ, српската војска само за паради и Пасуљански ливади (воен полигон во Србија), додека црковните великодостојници за молитви и денови на жалост, вели поранешниот претседател на косовскиот комитет на српската Народна партија.
Тој го обвини за предавство српското раководство, за кое тврди дека е „задоволно“ со фактот успеале „темелно да го анестезираат српското политичко битие и да ја сработат секоја домашна задача што им ја побарале ’странските партнери‘“, без да прецизира кои се тие партнери.
– За десет години успеаја да ја предадат и да ја уништат секоја форма на српска државност на Косово и Метохија, да ја сведат борбата на Србите за зачувување на животот и мирот на КиМ на пушкарање на опскурни ликови како Милан Радоичиќ и нему слични. Успеаја да го претстават убиството на српските млади момчиња и херои како обични жртви, што мора да се очекува и во иднина, како да не постои дипломатско-политички маневар што можат да го направат, вели Ристиќ.
Поради ова, порача тој, на Србите од Косово „не им останува ништо друго освен да се свртат кон самите себе, но на поинаков начин“.
– Излезот од предавството е Србите повеќе да не ги следат погрешните наредби и насоки на оние кои ги упатуваат на сигурно уништување. Не смееме да дозволиме да бидеме финансиски и политички влог за нашите претставници во Белград. Нашите животи немаат цена, ниту се мерат во квадрати или долари. Мораме да ги отфрлиме и лажните политички авторитети од нашите сопствени редови, кои ни се подметнати за во наше име да признаат некакви неразбирливи и нелогични потези со елементи на воена иконографија, вели Ристиќ.
Од „воените експерти“ во Србија тој побара веќе да не ги бранат косовските Срби, затоа што, во спротивно, нивната судбина ќе биде „идентична на судбината на Србите од Српска Краина“ во Хрватска.
– Би им порачал на воените експерти, кои за десет години загубија повеќе војници на воените вежби на територијата на централна Србија, отколку што загубија во одбраната на својот народ на Косово и Метохија, повеќе да не нè бранат така, бидејќи судбината на нас Србите во Косово и Метохија ќе биде идентична на судбината на Србите од Српска Краина, порача Ристиќ преку денешното соопштение.
