Време е Западен Балкан да постигне брз напредок на патот кон ЕУ, изјави специјалниот пратеник на ЕУ за дијалогот меѓу Белград и Приштина, Мирослав Лајчак.
Тој нагласи дека предизвиците со кои се соочуваат од секоја од земјите од Западен Балкан на тој пат се единствени и дека не може да се користи единствен пристап што ќе им одговара на сите.
„Истовремено, итноста за вклучување на нови членки во Унијата, нагласена со војната во Украина, не е дочекана со ентузијазам, туку со стагнација и уназадување во регионот. Ова мора брзо да се промени, бидејќи сега е време за интеграција во ЕУ“, напиша Лајчак на својот Фејсбук профил, откако беше гостин на самитот „Да се биде безбеден“ во Будва.
Лајчак посочи дека различните околности и фази со кои се соочуваат земјите од Западен Балкан на нивниот пат кон ЕУ бараат единствен и адаптиран пристап за Европската унија.
