Шефот на дипломатијата Бујар Османи вчера рече дека ако опозициската ВМРО-ДПМНЕ ги изгласа уставните измени ќе добие можност да одлучи за датумот на изборите. Христијан Мицкоски вели дека не сака да биде предмет на уцени.
-Ако ги изгласаат уставните измени ќе оставиме тие да одлучат кога ќе бидат изборите кога и да сакаат, денеска, утре, задутре, веднаш после изгласување на уставните измени. Мислам дека ова е фер понуда од наша страна, рече Османи коментирајќи го предлогот на Мицкоски парламентарни и претседателските избори да се одржат меѓу двата празника.
Доколку не се изгласаат уставните измени и ВМРО-ДПМНЕ опстои на својот став, тогаш, посочува Османи, остануваат редовните термини.
-Во тој случај мислам дека редовните термини треба да бидат земени предвид, и веќе останува прашање на технички и логистички пресметки по однос на одржување на изборите отколку политички проценки. Политичка проценка е оваа понуда. Нека ги изгласаат уставните измени, ќе оставиме тие да одлучат за денот на избори, кога и да сакаат и за претседателските и за парламентарните. Доколку не, одиме на редовни избори, дали ќе бидат заедно дали ќе бидат одвоено, е веќе прашање на логистика, техника и повеќе проценки на политичките партии да најдеме одреден консензус, вели Османи.
Тој не ги коментира критиките од коалицискиот партнер во Владата Алијанса за Албанците и повикот до ДУИ дека треба да си замине во опозиција. Важно е посочува, дека имаме добри меѓучовечки релации, добра соработка, професионална како министри и како коалициони партнери во рамки на Владата.
Мицкоски, пак вели дека не сака да биде предмет на уцени при создавањето на идната влада.
Тој вчера во Будимпешта повторно се сретна со Виктор Орбан, „домаќинот“ на Никола Груевски. Мицкоски се заблагодарил на поддршката од Унгарија посочувајќи дека тоа е доказ за вистинско пријателство, изразувајќи надеж дека таа поддршка ќе продолжи.
Портпаролот на СДСМ и пратеник Дарко Каевски, во понеделникот истакна дека ставот на СДСМ е принципиелен и непроменет, изборите ќе бидат наредната година во редовниот термин, прво претседателските, а потоа и парламентарните.
Како што истакна Каевски на прес-конференција, СДСМ е подготвена да разговара за датумите за изборите, на ниво на работни групи.
-Нашиот став е принципиелен и непроменет. Изборите ќе бидат наредната година во редовниот термин прво претседателски а потоа и парламентарни. За точниот датум за одржување на овие избори прво за претседателските, а потоа и за парламентарните сме спремни да разговараме на ниво на работни групи. Очекувам за брзо тие да се формираат и да почнат со работа, рече Каевски.
