Претседателот на Собранието на Северна Македонија, Талат Џафери на денешната средба со потпретседателката на германскиот Бундестаг, Ајдан Озогуз истакнал дека оваа посета е знак на континуираниот германски интерес за унапредување на соработката на сите нивоа, вклучително и на парламентарно ниво.
Џафери истакнал дека Сојузна Република Германија е наш силен поддржувач, особено на патот кон евроинтеграциите и изразил надеж дека овој континуитет на интензивната соработка ќе продолжи и понатаму.
-Тој ја истакна нашата определба во рамките на НАТО алијансата рамноправно да учествуваме во сите активности со нашите партнери, вклучително и во контекст на Украина каде сме активно вклучени во обезбедувањето на помош за потребите на украинските институции. Целосно сме приклучени и на ЕУ во однос на наметнувањето на санкции на Руската Федерација, се наведува во соопштението од собраниската прес-служба.
Џафери потврдил дека и понатака ќе продолжи поддршката што ја дава Собранието на ИПС програмата во чии рамки стипендистите кои престојуваат во Германскиот Бундестаг на обука и стажирање, одреден период поминуваат на пракса и во нашето Собрание.
Потпретседателката на германскиот Бундестаг, Ајдан Озогуз изразила благодарност за посетата на нашиот законодавен дом и задоволство од позитивниот однос кон продолжување на поддршката на ИПС програмата.
Озогуз, како што е наведено во соопштението, се задржала и на моменталната ситуација на безбедносен план на Европскиот континент и во светот и изразила очекување да се надмине овој период на поделен континент. Истакнала дека Германија силно ја подржува нашата земја за отпочнување на преговорите со ЕУ и дека верува оти и соседна Бугарија ќе ги преиспита своите чекори и одлуки.
На средбата биле разменети мислења и околу застапеноста и перцепцијата на младите во политиката, како и за родовата застапеност, односно учеството на жените во политиката. Како што се посочува во соопштението, Озогуз била позитивно изненадена од нашето законско уредување на ова прашање кое е над европскиот просек.
Двајцата соговорници изразиле согласност дека взаемната интензивна политичка комуникација ќе продолжи да се развива и во иднина.
