„Епилогот на 30. Самит на ОБСЕ, кој се одржа во Скопје, беше триумфален за западната дипломатија наспроти источната. Беше конфронтација меѓу регресивните сили кои ја поддржуваат ретроградната политика на Истокот и прозападните сили“, изјави новинарот Дестан Јонузи за телевизијата „Факс њуз Албанија“ говорејќи за случувањата и заклучоците што излегоа од 30. Самит на ОБСЕ, одржан минатата недела во Скопје.
Според него, учеството на шефот на руската дипломатија Сергеј Лавров на овој Самит е забележано дури откако американскиот секретар Антонио Блинкен го напушти Скопје.
– Лавров беше тотално игнориран на самитот на ОБСЕ во Скопје. Тој не сакаше ни да одговара на новинарските прашања за руската агресија во Украина, а за да ги избегне – ја коментираше косата на колегата новинар од Грузија. Она што вреди да се истакне е совршената организација и неуморната работа на шефот на дипломатијата на Северна Македонија, Бујар Османи кој преку Самитот успеа да го промовира главниот град на Северна Македонија, како и стратешката определба на Северна Македонија за членство во Европската Унија. Самитот на ОБСЕ ја означи стратешката определба и на Западен Балкан за членство во ЕУ, додека силен удар им беше зададен на ретроградните, регресивни сили, овде зборувам за Русија, кои сакаат да го прошират своето влијание и на Западен Балкан, вклучително и во Северна Македонија, вели Јонузи.
Учеството на Сергеј Лавров (Русија), додава тој, било само за да предизвика конфликти, но тоа вешто било игнорирано од европските лидери.
– Господин Бликен и Борел не му дадоа можност за средба на човекот чија земја е агресор врз украинскиот народ. Покрај американските и дипломатите на ЕУ, Лавров беше бојкотиран и од премиерот на Северна Македонија, г-дин Димитар Ковачевски. Тој одби да се сретне со него. Една од клучните пораки на 30. Самит на ОБСЕ беше дека на Западен Балкан нема место за ретроградните сили, проруските сили, екстремните националистички сили кои имаат за цел да го дестабилизираат регионот, подвлече меѓу другото Јонузи.
