Граѓаните на социјалните мрежи бурно реагираа на обидите на опозициската ВМРО-ДПМНЕ за ситни политички поени да ја злоупотреби трагедијата и убиството на 14-годишната Вања, настан што ја потресе целата држава.
Во време кога сите се шокирани и тагуваат, Игор Јанушев од ВМРО-ДПМНЕ одржа политиканска прес-конференција со шпекулации и дезинформации, потег кој не наиде на добар прием кај граѓаните. Тие веднаш го нападнаа ваквиот невкусен политикански обид и на трагедија да се ќаруваат политички поени од страна на опозицијата.
„Мрш бре, сега ли кога цел македонски народ тагува, ти политиканство пласираш?“, „Бери поени човекот, резил!“, „Само со изопачен ум како твојот може така да се размислува. Кој би скрил убиец бе лопужо, со такви навреди кон вработените во МВР треба јавно да се извиниш и да одговараш кривично“, „Навистина сте грозни! Срамота ДПМНЕ на што сте спремни само за политички поени“ се само дел од коментарите на социјалните мрежи под вестите од прес-конференцијата на Јанушев.
Граѓаните исто така забележуваат дека најголем дел од обвинувањата на опозициската ВМРО-ДПМНЕ им завршуваат со прашалници, свесни дека го користат немилиот настан за собирање евтини политички поени.
Министерството за внатрешни работи ги демантираше лагите на Јанушев.
„Министерството за внатрешни работи најостро ги демантира лагите кои на прес конференција беа изнесени од страна на Игор Јанушев од партијата ВМРО-ДПМНЕ, каде меѓу другите невистини, беше изнесена лага дека во СВР Скопје пред пет дена наводно било заведено дека убиството врз малолетната В.Ѓ. го извршил Љ.П., а, наводно, не било ништо преземено. Тоа е апсолутна невистина. Таква работа не постои. Згрозени сме од самиот факт што оваа партија дури и за ваква трагедија шири дезинформации. Министерството за внатрешни работи и ОЈО Скопје денеска на прес конференција детално презентираа се што е преземено во врска со овој случај. Апелираме да престане ширењето на лаги и дезинформации, кои само нанесуваат штета на истрагата“, се наведува во демантот од МВР.
Освен ВМРО-ДПМНЕ, во обид политички да се профитира од трагедијата тргна и Левица со своите лажни страници на социјалните мрежи.
Преку една од ваквите лажни страници, на која редовно се споделуваат сите партиски соопштенија, тие повикуваат на некаков протест, во време кога службите и институциите го решаваат случајот, има приведени и делото е признато.
Д. Е.
