Фрањо Туѓман и ХДЗ го одложија членството на Хрватска во ЕУ за десет години, а Македонија ги имаше Никола Груевски и сега Христијан Мицкоски и ВМРО-ДПМНЕ кои го одложуваат членството на земјава повеќе од 20 години, кажувајќи дека спасуваат национални интереси, а задушувајќи ја Македонија, пишува Ерол Ризаов во неговата колумна за „Дојче веле“.
Тој кажува дека населението во Хрватска било евроскептично пред влезот во ЕУ, а на референдумот за членство само 29 отсто од вкупниот број гласачи гласале потврдно. Половина од Хрватите во 2005 година сметале дека со членството во ЕУ ќе го загубат правото на својот јазик, но многумина стравувале дека ќе ги загубеле и националното признавање и идентитет.
„Мнозинството граѓани денес веруваат дека членството во ЕУ има многу повеќе предности отколку недостатоци. Земјата е позаштитена од кога било досега. Малкумина денес тврдат дека Хрватска го загубила својот суверенитет со влезот во Унијата. Напротив, таа профитираше во економска, политичка и безбедносна смисла токму поради членството во ЕУ и во НАТО. Се покажа дека членството во ЕУ и во НАТО ја зголемува моќта на малите земји“ заклучува Ризаов.
Паралелата со Македонија е очигледна, според Ризаов, кој вели дека лагите за предавство и загубени национални интереси ќе потраат се до конечното членство на Македонија во ЕУ.
