Кандидатурите за претседател на државата финишираат. До ДИК седум изјави за прифаќање иницијатива за собирање потписи за кандидирање за претседател.
На ден пред почетокот на рокот за собирање потписи за претседателски кандидати и за пратеници, во период од еден час најголемите политички партии ги соопштија своите претседателски кандидати, кои треба да добијат поддршка на партиски конвенции на почетокот на март.
Актуелниот претседател Стево Пендаровски доби поддршка од највисокото раководство на владејачката СДСМ за втор мандат, додека единствена кандидатка пријавена на јавниот оглас на ВМРО-ДПМНЕ е пратеничката Гордана Силјановска Давкова.
Кандидатот на ДУИ го соопшти лидерот Али Ахмети на видео обраќање на социјалните мрежи, кандидат ќе биде актуелниот шеф на дипломатијата Бујар Османи.
Претходно, Европскиот сојуз за промени соопшти дека нивен кандидат ќе биде Арбен Таравари, претседател на едното крило на Алијанса за Албанците.
До Државната изборна комисија (ДИК) досега, како што пренесе МИА, се поднесени вкупно седум изјави за прифаќање на иницијатива за собирање потписи за кандидирање за Претседател на Република Северна Македонија. Собирањето на потписи за листи на кандидат за претседател на државата почнува денеска.
Од ДИК синоќа информираат дека тројца од подносителите на изјавите, Вело Марковски, Билјана Ванковска Цветковска и Стевчо Јакимовски, ќе собираат потписи за кандидатура во подрачните канцеларии на Државната изборна комисија и пред нотари кои самите ги определиле. ДИК ги објавува листите на нотари каде што ќе се собираат потписите за кандидирање за Вело Марковски, Билјана Ванковска Цветковска и Стевчо Јакимовски, велат од ДИК.
Како што соопшти ДИК, четворица од подносителите, собирањето на потписите за кандидирање за претседател ќе го реализираат во подрачните канцеларии на Државната изборна комисија: Томе Николоски, Бујар Османи, Господин Поповски и Максим Димитриевски.
Професорката Билјана Ванковска ќе биде кандидат на партијата Левица, од партијата ГРОМ ќе одат со Стевче Јакимовски и ЗНАМ ќе истрча со Максим Димитриевски.
Рокот за собирање потписи за кандидати за претседател и за кандидати за пратеници започнува во денеска на 23 февруари и ќе трае до 8 март, согласно роковниците на ДИК. Кога подносител на листа на кандидат за претседател е група избирачи, потребно е да се соберат најмалку 10.000 потписи од запишаните избирачи во Избирачкиот список, додека кога подносител на листа на кандидат за претседател се пратеници, потребно е да се соберат најмалку 30 потписи од пратениците.
Учесниците на изборите, листите со кандидати за претседател на државата треба да ги достават до ДИК најдоцна до 19 март, на полноќ. Рокот за собирање потписи се однесува и за претседателските и за парламентарните избори.
Првиот круг од претседателските избори ќе се одржи на 24 април, а вториот круг на 8 мај, кога треба да се одржат и парламентарните избори. Изборната кампања за претседателските избори започнува на 4 април, а завршува на 22 април. За парламентарните избори кампањата започнува на 18 април, а завршува на 6 мај.
Ј. Ѓ.
Поврзано:
