Политичките партии покрај подготовките за почеток на изборната кампања за претседателските избори, ги составуваат и листите за кандидати за пратеници. Во политичкиот блок на Албанците битката се очекува да се води меѓу Демократската унија за интеграција (ДУИ) и опозициската коалиција ВЛЕН (Вреди).
Во најголемата партија на Албанците – ДУИ, имињата на кои се калкулира за носители на листи во првата ИЕ и кои имаат поддршка и од Али Ахмети се вицепремиерот Артан Груби и заменик министерот за внатрешни работи Назим Буши. Според партиски извори од ДУИ, амбиција да биде носител на листа во првата ИЕ покажал и првиот човек на општина Сарај, Блерим Беџети.
За оваа ИЕ – ДУИ го предвидуваше шефот на дипломатијата Бујар Османи како носител на листата, но со неговата кандидатура за претседател, интегративците сега размислуваат за следниот фронтмен.
Во втората изборна единица уште поголеми се амбициите за носител на листа за пратеници од таборот на интегративците. Покрај актуелниот координатор на пратеничката група Арбр Адеми и познатиот лекар Илир Хасани, амбициозност покажа и поранешниот пратеник Ејуп Алими, кој беше обвинет и осуден за манипулација на изборниот процес во Чаир – Скопје. Во меѓувреме, неофицијално се дознава дека и Аднан Исмаили, првиот човек на Издавачката куќа „Логос-А“ се очекува да биде предлогот на ДУИ и коалициските партнери за пратеник во втората изборна зона.
Во петтата ИЕ, во трката за пратеници како носител на листа на ДУИ, се споменуваат имињата на премиерот Талат Џафери, министерот за образование Јетон Шаќири, но и на Мехмет Жаку – шеф на кабинетот на министерот за надворешни работи, Бујар Османи. Во шестата изборна единица се очекува листата на ДУИ за пратеници да ја предводи лидерот Али Ахмети.
Од опозициската коалиција ВЛЕН, како што дознава „Фронтлајн“ од партиски извори, веќе ги доделиле носителите на ИЕ.
Изет Меџити ќе биде носител на коалицијата ВЛЕН во првата, Африм Гаши во втората, Билал Касами во шестата, а во петтата ИЕ ќе биде кандидат на Алијансата за Албанците – крилото на Арбен Таравари, од каде според партиски извори од ВЛЕН, се очекува носител да биде еден од поранешните пратеници Сурија Рашиди или Гарип Габа.
Претседателските избори ќе се одржат на 24 април, додека парламентарните избори ќе се одржат на 8 мај, кои овој пат ќе бидат редовни. Доколку има втор круг од претседателските избори, тие ќе се поклопат со парламентарните избори и ќе се одржат на 8 мај.
Кампањата за претседателските избори ќе започне на 4 април и ќе трае до 22 април, кога почнува и молкот што трае до 24 април. Политичките партии ги објавија своите кандидати за претседател. Кампањата за парламентарните избори ќе започне на 18 април и ќе трае до 6 мај. За време на молкот за претседателските избори ќе продолжи изборната кампања за парламентарните избори.
Дестан Јонузи
