Кога ќе слушнам заканувачки тонови, тоа веднаш ме потсетува на она што се случи пред дваесет и нешто години по планините околу нас, рече претседателот на СДСМ, Димитар Ковачевски вечерва со Свети Николе на митингот на Коалицијата за европска иднина.
– Гледам дека веќе растат тензиите за изборите. И има причина за тоа. Овие избори се клучни за нашата иднина. Овие избори се глас ЗА или ПРОТИВ нашата европска иднина! Овие избори не се за бисквити и гурабии. Мене тоа воопшто не ми е смешно! Затоа што кога ќе слушнам заканувачки тонови, тоа веднаш ме потсетува на она што се случи пред дваесет и нешто години по планините околу нас. Сакам да ѝ порачам на албанската заедница: ова е и ваша земја, никој не може да ви ги земе правата. Тие се запишани во Уставот. Но вие имате и одговорност. И ако се надевате дека некое незадоволство ќе се претвори во насилство, се лажете. Прво граѓаните нема да го дозволат тоа, никој здраворазумен нема да го дозволи тоа, рече Ковачевски.
Тој упати порака и до лидерот на ВМРО-ДПМНЕ Христијан Мицкоски.
– Внимателно по патот кој сте го фатиле, затоа што и тој има последици. Секоја блокада на европскиот пат не е само стагнација, тоа е и враќање назад. Назад во 2001 година или којзнае каде. Нашето национално единство е сѐ уште кревко. Не може да си дозволиме кој било да си игра со него, порача Ковачевски.
Тој на предизборниот митинг на СДСМ и Коалицијата во Свети Николе, се осврна на програмата и плановите во делот на земјоделството.
Посочи дека за земјоделците е планирана рекордна финансиска поддршка од 1,35 милијарди евра. Ковачевски истакна дека поддршката за земјоделството предвидува и грантови за мали производствени капацитети од 15.000 евра, за млади земјоделци од 10 и 20.0000 евра и грантови за жени земјоделки од 10.000 евра.
– Само со ЕУ можеме да ги подобриме состојбите во сите сегменти на општеството. Нема откажување од иднината, порача претседателот на СДСМ Димитар Ковачевски од Свети Николе.
