„Владата предводена од СДСМ е заслужна што Македонија стана рамноправна членка на НАТО, а ефектите од тоа ги чувствуваме денес, колкаво значење има членството во НАТО во ова време. СДСМ заедно со вас, граѓаните, ќе ја внесе земјата и во Европската Унија. И од тоа не се откажуваме! Тогаш кога ќе се случи, бидете уверени дека ќе го направи претседател на СДСМ и претседател на влада од СДСМ“ рече претседателот на СДСМ, Димитар Ковачевски на митингот во Струмица.
Тој додаде дека се свесни за казната во првиот круг од претседателските избори и дека го разбира револтот на дел од граѓаните поради политиките, одлукитеи кадровските решенија.
„Но, грешките ги прифативме, лекцијата ја научивме и ја извлековме поуката од критиките, затоа во иднина, пристапот ќе биде многу повнимателен. Ќе се соочиме со проблемите и со посветена и искрена работа, ќе работиме на решавање на состојбите. СДСМ секогаш е рамо до рамо со граѓаните и во мирни услови и во тешки времиња, во добро и во лошо, никогаш не сме се откажале од Македонија во која владеат социјал-демократските принципи на еднаквост, солидарност и инклузивност“ рече Ковачевски.
Претседателот на СДСМ додаде дека тој и неговата партија никогаш не бегаат од тешките одлуки, туку напротив, ги носи и сите тие тешки одлуки донесени од СДСМ се покажале како исправни и вистинскки на долг рок.
„Сега е време кога СДСМ треба да покаже единство и да покаже дека срцето на оваа партија чука силно, а тоа срце е секој од вас.“
Ова го истакна д-р Венко Филипче во својот говор на централниот митинг на СДСМ и Коалицијата за европска иднина во Струмица кој се одржа синоќа. Тој ги повика струмичани и сите социјалдемократи да излезат на 8 мај и дадат поддршка за СДСМ, бидејќи ниту Македонија може да оди напред без силен СДСМ.
„Ве повикувам да не се предаваме на апатијата, да избереме мобилизација. Сите кои сте разочарани, сте останале дома, сте решиле на некој начин да изразите револт, во ред е. Но, казната и на парламентарни избори би значела удар за самите вас, не само за партијата. Ќе значи заслабување на партијата која ве уверувам дека ќе се врати многу брзо на правилниот колосек. Но за тоа, е потребна вашата поддршка“, рече Филипче.
– Сега е потребна вашата поддршка, а промените кои ги барате во СДСМ ќе се случат. Во ваши раце е оваа одлука и не е касно да се исправи штетата. Не е касно да го направите вистинскиот избор сега, а го имате мојот збор дека промените кои ги барате ќе се случат, порача Филипче.
Поранешниот претседател на СДСМ Зоран Заев заедно со сопругата беа во првите редови на вчерашниот митинг во Струмица.
Ј. Ѓ.
