Сите ние копнееме по малку мир и тишина одвреме-навреме – некое време да бидеме сами со нашите мисли.
Според луѓето кои биле на најтивкото место на Земјата, тишината не е толку златна како што нѐ наведоа да веруваме.
Можеби очекувате ова да биде во оддалечен дел од некоја голема пустина, додека, всушност, се наоѓа во истражувачка лабораторија во Минесота.
Внатре во анехоичната комора во лабораториите Орфилд е толку тивко што можете да ја слушнете вашата крв како тече и коските се движат, пишува магазинот Indy100.
Изработена од акустични слоеви од фиберглас со дебелина од 3,3 метри и двојни ѕидови од изолиран челик и дебел бетон, собата апсорбира 99,99 проценти од звукот.
Условите во ѕидовите во стилот на Форт Нокс се толку интензивни што најдолгото време што некој можел да го издржи таму е 55 минути.
„Ги предизвикуваме луѓето да седат во комората во темница“, изјави основачот на лабораторијата Стивен Орфилд за Hearing Aid Know. „Кога е тивко, ушите ќе се прилагодат. Колку е потивка собата, толку повеќе работи слушате. Ќе го слушнете чукањето на вашето срце, понекогаш можете да ги слушнете вашите бели дробови, да го слушнете гласно шумолењето на стомакот“.
Во анехоичната комора вие станувате звук.
Она што тој го мисли со ова е дека, со отсуство на надворешен шум, вашите уши се принудени да се прилагодат на незамисливата тишина и почнуваат да се фокусираат навнатре на вашиот сопствен ум и телесни функции.
Понатаму, по само 30 минути субјектите почнуваат да халуцинираат.
Орфилд објасни дека исто така е невозможно да се остане во собата повеќе од половина час без да се седне бидејќи ориентацијата на личноста е во голема мера втемелена во звуците што ги испуштаат при движење.
„Како се ориентирате – преку звуците што ги слушате кога одите. Во анехоичната комора немате никакви знаци. Ги одземате перцептивните знаци кои ви дозволуваат да балансирате и маневрирате. Ако сте таму половина час, мора да бидете на стол. За сите кои сметаат дека би можеле да го надмине рекордот од 55 минути, можно е сами да ја доживеете комората“, изјави тој за Daily Mail.
Лабораториите нудат турнеја, наречена „Анехоичното искуство“, која им овозможува на учесниците да го преземат предизвикот, под услов да се подготвени да издвојат 600 долари (околу 470 фунти) на час за привилегијата.
„Сведоци сме на многу навидум чуда, од кои некои имаат објаснувања, а некои остануваат мистерии, како резултат на времето поминато во нашата анехоична одаја. Остануваме љубопитни за природата на влијанието на комората врз сите луѓе, нејзините терапевтски својства и како таа може да влијае на човечката перцепција. Додека анехоичните комори традиционално се користат за проучување на производите, нашата исто така станува за луѓето“, наведува Орфилд на наговата веб страница.
Подготви: Ј. Ѓ.
