Продолжуваат партиските препукувања помеѓу владините партнери Коалицијата ВЛЕН и претседателот на ЗНАМ, Максим Димитриевски.
Максим Димитриевски вчера истакна дека е погрешно „Вреди“ (ВЛЕН), да го имитираат ДУИ, а ВЛЕН денеска му возвратија преку партиско соопштение каде апелираат до Димитриевски „да не му прави ќеиф на ДУИ“.
Димитриевски: Мислам дека е погрешно „Вреди“ да го имитираат ДУИ
Мислам дека е погрешно „Вреди“ да го имитираат ДУИ, бидејќи ДУИ е веќе видена работа и едно минато, изјави денеска претседателот на ЗНАМ, Максим Димитриевски, прашан во какви односи се со коалицијата „Вреди“ по несогласувањата околу Балансерот.
– Мислам дека нашиот партнер во власта, иако ЗНАМ е партнер со ВМРО-ДПМНЕ во оваа власт и во ниту еден момент ние немаме како политичка партија разговарано за било каква коалиција или заемна поддршка на централно ниво, но, сепак тие се партнер на нашиот партнер, го почитуваме тоа, но, ќе мора да направат корекција на самите себеси. Мислам дека е погрешно да го имитираат ДУИ, бидејќи ДУИ е веќе видена работа и едно минато. Треба да креираме нови политики за економски раст и развој на државата, бидејќи граѓаните веќе не се оптеретени, кој какво знаме ќе вее или кој е поголем заложник за исполнување на некои си наводни национални платформи и стратегии, туку едноставно, граѓаните сакаат да живеат во средена држава во која корупцијата ќе се намали, ќе се изгради систем и ќе се направи функционална држава, функционален систем во функција на граѓаните и на државите, одговори Димитриевски, кој присуствува на форумска дебата – „Државните стратегии и предизвиците за одржлив развој на општините“, на факултетот „Хајделберг“ во Скопје.
Димитриевски рече дека видел од социјалните медиуми за случајот со приватната посета на собранискиот спикер Африм Гаши со службени возила. Тој рече дека чека официјален одговор од надлежното Министерство, во делот на „уредување на режимот на движењето на ваков тип на високи функционери“.
– Откако ќе го слушнам, ќе го дадам и својот став. Доколку возилото е користено за приватни потреби и семејни веселби, тоа е недозволиво. Во спротивно, ако вие вршите една таква висока функција во државата и ви следува обезбедување, извршено сѐ согласно протоколот, тогаш нема никакви пречки да се прави тоа. Но, сепак оставам на официјалните надлежни државни институции да се произнесат по случајот, а потоа и јас ќе го дадам своето видување, рече Димитриевски.
ВЛЕН: Апелираме до Димитриевски да не му прави ќеиф на ДУИ
Секој политички субјект има демократско право да си гради идентитет врз основа на сопствените уверувања. Не мора да се согласуваме за сите прашања, но мора да се почитуваме со оглед на фактот што сме дел од заедничка Влада, бидејќи тоа е во интерес на сите граѓани без разлика на етничка, верска или политичка припадност, реагираат од ВЛЕН.
„Како Влада имаме утврдени и усогласени програмски приоритети и наша должност е посветено да работиме на нивно исполнување. Во тој контекст апелираме ЗНАМ несвесно да не му тера ќеифови на ДУИ. Нивното криминално раководство посакува тензии на сите полиња. За да се спасат од кривична одговорност за сторената политичка корупција и да го зачуваат нелегално стекнатиот имот сонуваат и за потреси во владејачката коалиција. ВЛЕН доби 107 илјади албански гласови и не може етнички да се обезличува само за движењето ЗНАМ удобно да се чувствува во Владата. Особено што Димитриевски е избран за Градоначалник на Куманово и со Албански гласови и многу добро ја знае важноста од меѓусебното разбирање и почитување. Не сакаме да веруваме дека ЗНАМ сакаат да влезат во кампања за локалните избори со повторувањето на погубното кредо на Тито Петковски од претседателските избори во 1999 – не ни требаат гласовите на Албанците“, истакнуваат од ВЛЕН.
Оттаму велат дека парламентарното мнозинство се состои од две коалиции и едно движење како што е ЗНАМ.
„Тезата дека тие се партнери само на ВМРО-ДПМНЕ е наивен популизам со краток sдив. Во секоја медиумски настап логично е ЗНАМ јасно да се декларира како владин партнер, без да дозволи комплексот од ДУИ во времето на владеењето со СДСМ да му ја замаглува политичката диоптрија и да ги усложнува односите во Владата за ситни политички поени. ВЛЕН е создаден како рефлексија на потребата на мнозинството Албанци кои бараа опција сосема спротивна од ДУИ. ВЛЕН ќе продолжи да гради автентична политичка доктрина, која ја спроведува преку нова и модерна коалициска структура, чија обврска е да ги решава проблемите на граѓаните и да обезбеди сигурна иднина за Албанците. Коалицијата ВЛЕН е искрено и чесно посветена на децентрализацијата, динамизирањето на ЕУ перспективите и продолжување на својата работа за справување со криминалот и корупцијата“, се нагласува во соопштението од ВЛЕН.
Ј. Ѓ.
