Северна Македонија треба да ја исполни обврската за завршување на уставните измени, за да продолжи со преговорите и истовремено да го забрза темпото на спроведување на реформите, бидејќи не бележи значителен напредок, се вели во извештајот на Европската комисија за Македонија.
Друга слаба точка во извештајот е недостигот на судска доверба, додека борбата со корупцијата и организираниот криминал, што е подвлечено во извештајот без напредок, останува загрижувачка за Европската комисија.
– Извештајот од три четвртини се однесува на периодот од 2023 до изборите, а само еден мал дел се однесува на тоа што е направено во последните сто дена. Во таа смисла се констатира дека државата сè уште не ги усвои уставните измени во однос на статусот на бугарското малцинство во Македонија. Од друга страна, се истакнува сè уште проблемот на корупцијата и отсуството на владењето на правото. По однос на барањето на премиерот Мицкоски да дојде до промена на Уставот со одложена примена, да се гарантира дека нема да има било какви нови услови од страна на Бугарија – извештојот не навлегува длабоко во оваа тема, но се цитира реченицата на Урсула фон дер Лајен дека: „младите никогаш нема да ни простат ако не направиме Северна Македонија да биде дел од Европската унија“, вели за „Фронтлајн“, Нано Ружин – универзитетски професор и поранешен амбасадор во НАТО.
Покрај усвојувањето на уставните измени во Извештајот се нагласува потребата од спроведување на билатералните договори со соседните земји, односно на Договорот од Преспа и на Договорот за пријателство, добрососедство и соработка со Бугарија.
Во документот се повикува и на интензивирање и на темпото на реформи поврзани со приближувањето кон ЕУ, пред се на зајакнување на владеењето на правото, зголемување на довербата во правосудниот систем, како и на спроведување на истрагите, гонењето и конечното завршување на долготрајните судски процеси поврзани со „лица од висок профил“.
Дестан Јонузи
