Високиот комесар на ОН за човекови права Фолкер Тирк денеска изјави дека политичката транзиција во Сирија мора да осигура одговорност за прекршителите на човековите права.
„Треба да внимаваме одговорните за прекршувањата, без разлика дали станува збор за претходната власт, претседателот или други, да положат сметка. Ова ќе биде клучен елемент на транзицијата,“ изјави Тирк на прес-конференција во Женева.
Тој нагласи дека е неопходно да се преземат мерки за заштита на малцинствата и спречување на одмазднички дејствија. Исто така, истакна дека доказите треба внимателно да се чуваат за идни процеси.
Тирк ги повика сириските власти на реформи во безбедносниот апарат и акцентира дека транзицијата треба да обезбеди разговор за трагедијата со исчезнатите лица. – Единствениот пат напред е преку национален политички процес што ќе ги реши страдањата, ќе одговори на аспирациите на сите Сиријци и ќе гарантира вистина, правда, обнова, заздравување и помирување, рече тој.
Комесарот посочи дека е неопходно човековите права на сите Сиријци да бидат во центарот на таквиот процес, благодарение на инклузивното учество на жените и младите.
Тој рече дека неговите служби се подготвени да го поддржат процесот на транзиција.
