Веројатноста дека астероидот „ЈР-4“ ќе удри во Земјата сега е 3,1 отсто, покажуваат најновите податоци на американската Национална воздухопловно-вселенска администрација – НАСА. Тоа е највисоко ниво забележано од почетокот на следењето на небесните тела.
Според францускиот весник „Фигаро“, овој астероид се проценува дека е широк меѓу 40 и 90 метри, а постои веројатност да ја погоди нашата планета на 22 декември 2032 година, како што покажуваат пресметките на научниците. Неговото влијание, потенцијално, може да уништи цел град – мегалополис. Ваквите предвидувања, сепак, треба да се земат со одредена резерва, бидејќи се засноваат на променливи податоци, посочуваат стручњаците.
Научниците предупредуваат дека астероидот треба внимателно да се следи, бидејќи, според сегашните проценки, последиците од таквиот можен удар би можеле да бидат 500 пати посилни од нуклеарната бомба фрлена врз Хирошима во Јапонија во Втората светска војна.
Ударот би можел да предизвика и цунами ако е близу остров или брег.
Стручњаци од Европската вселенска агенција – ЕСА велат дека астероидот најверојатно безопасно ќе мине покрај Земјата, но можниот удар сѐ уште не може целосно да се исклучи, пренесува списанието „Скај ет најт“. Според наводите, сѐ уште е рано да се утврди каде точно на Земјата би можел да удри астероидот. Научниците сметаат на вселенскиот телескоп „Џејмс Веб“ за попрецизно набљудување и проценки следниве месеци.
Претпоставките говорат и дека патеката на вселенското тело, всушност, ќе го оддалечи од Земјата и тоа ќе исчезне од опсегот на нашите телескопи токму наредниве месеци, а тоа повторно ќе стане видливо за Земјаните во 2028 година.
Поврзано:
Колкави се шансите астероидот „2024 YR4“ да удри на Земјата во 2032 година и зошто варираат?
