На денешната прес-конференција на СДСМ, портпаролката Богданка Кузеска обелодени нови детали за, како што рече, серијата скандали поврзани со корупција и сомнителни тендери на владејачката ВМРО-ДПМНЕ. Во фокусот на обвинувањата е министерот за надворешни работи, Тимчо Муцунски, за кого од СДСМ тврдат дека стои зад мрежа на тендери преку кои се „испумпуваат“ пари од државниот буџет, вклучително и од унгарскиот кредит.
Според информациите презентирани од Кузеска, Министерството за надворешни работи потпишало договор за изградба на челична настрешница во вредност од речиси 550.000 евра. Овој договор, како што беше истакнато, е склучен со градежната компанија „Пирамид билдинг солушнс“, која била единствен понудувач на тендерот. Од СДСМ тврдат дека ова е дел од „новата ера на кражби“ поврзана со проектот „Скопје 2014“, кој светските медиуми го нарекоа „најголемиот коруптивен проект во Европа“.
Скандалот добива дополнителна тежина со наводите дека „Пирамид билдинг солушнс“ има долга историја на соработка со Муцунски. Компанијата, според СДСМ, добила 11 тендери во Општина Аеродром во вредност од 2 милиони евра додека Муцунски бил градоначалник. Еден од договорите, вреден 335.000 евра, бил за хигиенски и комунални услуги. Дополнително, од унгарскиот кредит, фирмата наводно добила три тендери во износ од околу 1,8 милиони евра во последните три месеци, вклучително и тендер за реконструкција на скверот зад ТЦ „Капитол“ во вредност од 700.000 евра, на чиј почеток присуствувал и премиерот Христијан Мицкоски.
„Вкупно, само преку бизнисот со Општина Аеродром, речиси 4 милиони евра завршиле кај оваа компанија“, истакна Кузеска, додавајќи дека фирмата добила и осум тендери во Општина Гази Баба за време на мандатот на ДПМНЕ.
Од СДСМ изразија сомнеж дека станува збор за координирана шема на ВМРО-ДПМНЕ за фаворизирање на блиски компании и нетранспарентно трошење на јавните пари. Тие побараа итна истрага од надлежните институции за коруптивните зделки на Муцунски, утврдување на одговорност на сите вмешани и одговор на прашањето каде завршуваат парите од унгарскиот кредит.
„Граѓаните не смеат да бидат жртви на нови коруптивни афери на ДПМНЕ. СДСМ ќе продолжи да се бори за правда и отчетност, а секој што го злоупотребил народниот денар ќе одговара“, заклучи Кузеска.
