„Господинот Пендаровски има поента кога вели дека не требало толку да се позиционираме кон Трамп. Со оглед на сите контроверзи кои го опкружуваат трамповото претседателствување, не ја исклучувам можноста и тој да се предомисли за многу од политиките за кои се залага. Во тој случај ќе испаднеме смешни како држава, а непотребно се оддалечуваме од политиките на Европската унија“, вели во изјава за Фронтлајн, Димитар Николовски извршен директор на ЕВРОТИНК, коментирајќи го ставот на поранешниот претседател на државата Стево Пендаровски околу позиционирањето на Влада во однос на „новото нормално“ на Трамп.
Селим Ибраими од Институтот за безбедносни и развојни студии смета дека Владата треба да се концентрира на сериозни реформи без разлика дали тоа го сакаат ЕУ или САД.
– Без разлика на големината на државата и нејзиното значење, важно е една влада да одржи реален курс со светот. Понекогаш личните врски, лобирањето и идеолошките ги надминуваат традиционалните основи на дипломатијата и надворешната политика. Така, гледајќи ја меѓународната ситуација, таа во ЕУ и судбината на Украина, мислам дека владата е во право. Надворешните критики од опозицијата се конзистентни со опозициските ефекти. Но, онаму каде што треба да престане ова усогласување на Северна Македонија е веднаш штом Украина и Русија постигнат мир. И таму владата треба да се концентрира на сериозни реформи без разлика дали ЕУ или САД ги сакаат, изјави Ибраим за Фронтлајн.
Поранешниот претседател Стево Пендаровски изјавил дека го загрижува позиционирањето на Владата во поглед на новата американска администрација.
– Многу е важно како ние како мала држава, знаете во кој регион сме лоцирани, се поставуваме наспроти тие глобални промени. Трамп ја поремети глобалната рамнотежа, ја поремети внатрешно трансатлантската заедница, затоа што воведе царини и започна со офанзивни дејствија против своите најголеми сојузници досега и соседи, но она што посебно ме загрижува е позиционирањето на нашата нова Влада во однос на администрацијата на Трамп. Реченицата која ја кажа нашиот премиер Мицкоски по враќањето од Америка дека треба да се навикнеме на ова ново нормално и дека тоа ново нормално ќе го преплави светот е опасна теза. Од новото нормално не се преплавени ниту Америка, Канада, Мексико, Велика Британија,… рече Пендаровски.
Впечатокот дека владата на Северна Македонија сè повеќе се усогласува со политиките на новата администрација на Доналд Трамп дополнително се зацврсти по втората посета на премиерот Христијан Мицкоски на Вашингтон за помалку од еден месец и средбите што тој таму ги имаше за време на годишната Конференција на конзервативната политичка акција.
Дестан Јонузи
