Ова е тежок и многу тажен ден за Македонија! Загубата на толку многу млади животи е ненадоместлива, а болката на семејствата, на најблиските и пријателите е неизмерна. Во овие моменти на длабока тага, нашите мисли се со оние што ги загубија своите сакани. На повредените им посакувам брзо закрепнување, а на семејствата на загинатите – сила да ја издржат оваа незамислива загуба, напиша премиерот Христијан Мицкоски на „Фејсбук“.
Премиерот ги повикува сите надлежни институции – здравствените служби, полицијата, локалните власти да преземат итни мерки за помош на повредените и поддршка на погодените семејства.
– Владата е целосно мобилизирана и ќе направи сè што е потребно за справување со последиците и утврдување на причините за оваа трагедија. Во текот на денот, по согледување на околностите од надлежните институции ќе и’ се обратам на јавноста со повеќе информации за преземените чекори. Во овие времиња на длабока тага, кога нашите срца се скршени од болка поради оваа ужасна трагедија, повикувам на заедништво, сплотеност, хуманост и одговорност, вели Мицкоски.
Мицкоски е во Кочани од утрово и ја следи состојбата, информираат од Владата.
Премиерот го одлага патувањето во Подгорица на состанок на ЕПП, а ќе побара и одлагање на Самитот за Западен Балкан што треба да се одржи во Скопје.
Претседателот на СДСМ, Венко Филипче изрази сочувство до семејствата и блиските на настраданите во страшната тагедија во Кочани.
-Со тешко срце ја примив веста за страшната трагедија во Кочани. Ова е црн ден за Македонија. Загубата на толку многу млади животи е ненадоместлива болка за семејствата, за нивните пријатели, за сите нас. Во овој момент на длабока тага, сакам да изразам најискрено сочувство до семејствата кои изгубија најблиски и да им посакам брзо закрепнување на повредените. Во вакви моменти, единствено што е важно е солидарноста и поддршката, стои во објавата на Филипче на неговиот фејсбук профил.
Тој ги повика сите институции, здравствените работници, но и целото општество да се обединиме во помошта за настраданите и нивните семејства.
-Како лекар, стојам на располагање за секој вид помош што можам да ја дадам во оваа тешка ситуација. Сега не е време за поделби, туку за обединување во тагата и во напорите да помогнеме, се наведува на статусот на фејсбук на претседателот на СДСМ Венко Филипче.
Поради огромната трагедија што се случи во Кочани СДСМ ги одложи внатрепартиските избори за Претседател на партијата. Општинските организации на СДСМ ќе се вклучат во помошта за настраданите во пожарот, соопштија од партијата.
-Изразуваме длабоко сочувство до семејствата, роднините и пријателите на загинатите во огромната трагедија што се случи во Кочани. На повредените им посакуваме брзо и целосно закрепнување. Во овие тешки моменти, нашите мисли и молитви се со сите засегнати од оваа страшна несреќа, се наведува во соопштението.
Во пожарот во дискотеката во Кочани, според официјалните информации што ги соопшти министерот Тошковски, загинаа 51 лице и над 100 се повредени.
Прочитајте и…
Тошковски: Најмалку 51 лица го загубија животот во пожарот во Кочани, над 100 се повредени
