Сопругата на пејачот Андреја од „ДНК“, кој загина во несреќата, во објава на социјалните медиуми замоли надлежните органи да извршат детален увид за целиот настан додавајќи дека пиротехниката не била донесена од страна на бендот.
„Во овој момент, кој е најтежок за нас, медиумите и државните институции, ме предизвикувате за прв пат да се обратам до македонската јавност. Во текот на вчерашниот ден, по потрага на својот сопруг Андреја Ѓорѓиески, да го најдам во некоја од болниците, на домашна адреса не посетила криминалистичката служба која без објаснување го барала мојот сопруг, во присуство на нашето дете. Истата служба ме побара телефонски во неколку наврати со НАЈНЕХУМАН однос да дадам информација каде е мојот сопруг со цел да даде изјава за настанот, за што истото прашање го упатив кон нив. Од медиумите, кои пренесуваат ЛАЖНИ информации, дознале дека сопругот е на домашно лекување, додека тој лежи во болницата во Кочани, мртов. Ги замолувам сите јавни медиуми да не шират дезинформации на социјалните мрежи. Ги замолувам и јавните органи да си извршат детален увид за целиот трагичен настан. Во овој тежок момент за сите нас, ЈАВНО ги замолувам институциите и медиумите да ја почитуваат пред се, нашата приватност. Лажни објави дека мојот сопруг е на домашно лекување и дека пиротехниката е донесена од страна на бендот, ве молам, НЕ ШТИТЕТЕ НЕКОЈ КОЈ ТРЕБА ДА Е ПОЗАДИ РЕШЕТКИ! Како сопруга и мајка на малолетно дете, покажете малку сочувство, а така и за поблиското семејство и пријателите….“ напиша во објавата, Наталија Ѓорѓиевска, сопруга на Андреја Ѓорѓиевски.
Министерот за внатрешни работи Панче Тошковски во изјава за медиумите претходно денеска рече дека пиротехничките средства кои се и причина за пожарот ги донел бендот ДНК.
Портпаролката на Владата Марија Митева попладнево на прес-конференција во Владата во врска со објавата од Ѓорѓиевска, рече дека „нема да коментира изјави на лица кои изгубиле некој близок во трагедијата во Кочани“
– Во овој момент не би си дозволила, пред се како човек, да коментирам изјава на било кој што изгубил свој близок во оваа трагедија, рече Митева.
Ј. Ѓ.
