Милена Јаневска од иницијативата „Кој е следен?“ во емисијата Аргумент плус на ТВ24 изјави дека главните барања на граѓанското движење се фокусирани на одговорност, транспарентност и безбедност.
Според неа, иницијативата се однесува на сите трагедии што ја потресле Македонија и не е поврзана со ниту една политичка партија.
„Нашите барања се поделени во две категории: одговорност и безбедност. Безбедносните аспекти произлегуваат од случајот во Кочани, а транспарентноста подразбира објавување на сите релевантни документи – од основањето на дискотеката до пожарот. Покрај тоа, имаме и барања поврзани со претходни несреќи, како и мерки за спречување на идни трагедии. Една од нив е дигитална платформа е-инспекторат, каде што ќе бидат достапни сите инспекциски надзори, како и воспоставување централен број за пријавување нерегуларности“, објасни Јаневска.
Во однос на одговорноста, таа нагласи дека истрагата треба да утврди кривична вина, но морална одговорност треба да понесат сите инволвирани во трагедиите. „Нашиот револт е дополнително поттикнат од фактот што пратениците заминаа на одмор во најкритичниот момент за државата“, истакна таа.
Јаневска потенцираше дека иницијативата не е политичка партија и не е поврзана со ниедна. „Работиме на процес кој овозможува поголема транспарентност и филтрирање на намерите на оние што сакаат да се приклучат. Секој кој сака да стане дел од иницијативата пополнува формулар со основни информации и причина за приклучување. Јас лично се приклучив на истиот начин, бидејќи не бев тука кога се случи трагедијата со Фросина. Свесни сме за етикетирањата и обидите да се дискредитираат нашите чисти намери, но нашата цел е притисок врз надлежните, бидејќи досега не видовме конкретни резултати. Досега немавме контакт со институциите, ниту тие нè контактирале, ниту пак ние нив“, заклучи Јаневска.
Иницијативата „Кој е следен?“ в сабота од 11 часот иницира настан пред македонското Собрание.
„Кога тие ги пакуваат куферите, ние ја полниме улицата. Кога тие заминуваат на одмор, ние доаѓаме пред Собранието. Не затоа што немаме што да правиме. Туку затоа што имаме што да кажеме“, се наведува во објавата на Инстаграм, на „Кој е следен?“.
Како што велат тие, собирот пред Собрание е поради тоа што имаат „барања што не може да чекаат и затоа што демократијата не оди на одмор“.
Оттаму истакнуваат дека настанот ќе биде поделен во 2 дела:
1. Презентирање на барањата, во првиот дел ,,Кој е следен?” ќе ги презентира своите барања во целост;
2. Микрофонот е отворен за секој граѓанин кој сака да го изнесе своето мислење околу барањата, или да сподели генерален став за моменталната состојба.
„Граѓаните ќе зборуваат. Ќе критикуваат. Ќе поддржуваат. Ќе го кажат тоа што предолго тлее. Ова е простор за гласот што не сакаат да го слушаат. Ова е твојот простор. Наш простор. Настанот ќе трае додека има граѓани што сакаат да бидат слушнати. Ако имаш што да кажеш — подготви го дома и кажи го пред сите. Не чекај да те повикаат. Нека ова биде твојот повик!“, наведуваат од Иницијативата „Кој е следен?“.
Ј. Ѓ.
Поврзано:
