Двајца турски новинари, Тимур Сојкан од весникот „БирГун“ и Мурат Агирел од весникот „Џумхуриет“, се приведени денеска на основа на, како што наведуваат весниците, лажни обвиненија кои произлегуваат од нивното работење.
Сојкан, кој е и писател, и Агирел се уапсени во нивните домови под обвинение за закани и уцени во истрагата на главниот јавен обвинител во Истанбул. За време на претресот биле прегледани компјутери и други дигитални материјали, пишува весникот „Џумхуриет“.
Двата весника ја критикуваа Владата на претседателот Реџеп Таип Ердоган. Тие опширно известуваа за настаните по апсењето на градоначалникот на Истанбул, Екрем Имамоглу на 19 март, што доведе до најголемите протести во Турција во повеќе од една деценија.
Енес Ерманер, нивниот адвокат, протестираше поради апсењето и рече дека со обвинителот претходно било договорено тие денеска доброволно да дадат изјави.
Сојкан и Агирел се одведени во полицијата во Истанбул по преглед во болница. Полицијата може да ги задржи до четири дена. Ниту еден датум од судот веднаш не е одреден.
Повикувајќи се на одлуката на обвинителството, „Џумхуриет“ напиша дека тие се приведени „поради можност да избегаат, да уништат, изменат или прикријат докази“.
