Премиерот Христијан Мицкоски на 25 март изјави дека доколку опозицијата се согласи, ние (власта) сме секогаш подготвени за предвремени парламентарни избори, но додаде: „Не сум сигурен дека целата опозиција бара предвремени парламентарни избори“.
Но, последниот став на сите опозициски партии, но и на дел од владините коалициски партнери, е за предвремени парламентарни избори – заедно со локалните избори кои се очекува да се одржат во октомври годинава.
И покрај ова, политичкиот аналитичар Ацо Кабранов вели дека дали ќе има или не предвремени парламентарни избори заедно со локалните зависи од најголемата владејачка партија, ВМРО ДПМНЕ.
– Владејачките партии имаат мнозинство и во секој момент можат да распишат предвремени парламентарни избори, не само со локалните туку кога сакаат можат. Се зависи од ВМРО ДПМНЕ. Ако премиерот и лидер на партијата како што тој вели израчуна математички прецизно дека со локалните да се одржат и парламентарните тогаш ќе има. Но не верувам, мислам дека повеќе од 58-те пратеници кои ги има на следните избори нема повторно да ги добие. Според мене Мицкоски нема да оди на локалните избори заедно и со парламентарни и ќе владее во комоцијата што граѓаните му ја дадоа на последните парламентарни. Со толку пратеници и речиси сите медиуми како Вучиќ во Србија зошто би се замарал со предвремени кога до редовните има уште цели три години, анализира Кабранов за Фронтлајн.
Поранешниот пратеник Зуди Џелили оценува дека според сегашната ситуација каде парламентарното мнозинство брои 78 пратеници, што претставува стабилно мнозинство за власта, нема потреба од предвремени парламентарни избори.
Но, додава тој, доколку ситуацијата се промени и се намали бројот на пратеници Албанци од ова парламентарно мнозинство, тогаш легитимитетот на албанските партии во владата станува под знак прашалник бидејќи остануваат со девет пратеници.
– ДУИ е таа која во име на Европскиот фронт бара двојни избори наесен кога ќе се одржат локалните избори, но наскоро ќе биде јасно каков став ќе заземат повеќето други партии. Политички блеф се реакциите на премиерот дека не се плашиме од двојни избори, како и емотивната реакција на Изет Меџити од ВЛЕН дека прифаќаме предвремени избори. Верувам дека освен ВМРО ДПМНЕ и уште две партии кои имаат висок рејтинг, на никој друг не му одговараат двојни избори. Не им се допаѓа затоа што ако е ВЛЕН оди на избори без Алијансата за Албанците на Арбен Таравари нема да освои ниту една општина затоа што којзнае што ќе биде со нив тогаш, изјави Џелили за Фронтлајн.
Најголемата опозициска партија во земјата СДСМ е целосно подготвен за сите можни изборни сценарија – како за редовните локални избори, така и за евентуални предвремени парламентарни избори, изјави лидерот на СДСМ, Венко Филипче.
И најголемата партија на Албанскиот блок, Демократската унија за интеграција (ДУИ) – која делува во опозиција бара одржување на предвремени парламентарни избори, повикувајќи ги албанските партии во власта да ја проверат поддршката од народот.
– ДУИ јавно им се обраќа на албанските партии во Владата со јасен повик: Ако не се плашите од волјата на народот, ајде на избори. Ако мислите дека народот се согласува губитнички партии да ги претставуваат Албанците – ајде на избори, соопштија од партијата.
Коалицијата ВЛЕН која сега делува без петте пратеници на Алијанса за Албанците, првично обвини дека повикот на ДУИ има за цел да го прикрие, како што наведоа, нивното криминално минато, но подоцна соопшти дека прифаќа излез на предвремени избори.
– Ако мислите дека треба да нѐ претставуваат тие што со нашите пари го купија трговскиот центар Соравија – ајде на избори. Ако мислите дека треба да нѐ претставуваат тие што нѐ труеја со канцероген мазут – ајде на избори. Ако мислите дека треба да нѐ претставуваат тие што ги спасија Груевски и Мијалков од затвор – ајде на избори, соопшти ВЛЕН.
Но, очигледно и без Aлијанса за Албанците, оваа коалиција не е координирана во однос на јавно искажаните ставови. Така, неколку часа по оваа објава, претседателот на Алтернатива Зеќирија Ибрахими и претседателот на Собранието Африм Гаши се изјаснија дека не се за предвремени парламентарни избори иако нивната партија има само двајца пратеници во Собранието.
Парламентарното мнозинство е стабилно без разлика дали некој ќе излезе или влезе заради превирањата во коалицијата ВРЕДИ – изјави претседателот на Собранието Африм Гаши.
-Мислам дека нема потреба од никаква паника, мнозинството е стабилно, мислам дека треба да се продолжи понатаму да се работи без разлика дали некој ќе влезе, ќе излезе. Мислам, нема да има голема промена во бројот на пратениците. Мнозинството е многу стабилно, веќе околу две третини имаме, рече Гаши.
И владејачката ВМРО-ДПМНЕ по седницата на Централниот комитет на партијата соопшти дека Владата е стабилна и силна, и ги исполнува очекувањата на граѓаните.
Дестан Јонузи
