Поминаа речиси три месеци од трагичниот настан во Кочани, кога 62 млади животи беа загубени во пожар во дискотека која, како што беше обелоденето, работела без лиценца и без основни безбедносни протоколи. Но, наместо институционална поддршка и одговорност, семејствата на жртвите се соочуваат со „молк, игнорирање, а сега и со обвинувања“, реагира Иницијативата „Кој е следен?“ во своја најнова објава.
Повод за реакцијата е изјава на премиерот, во која, како што се наведува, родителите биле обвинети дека „ја напаѓаат власта од политички побуди“.
„Тоа е крајно неодговорна и срамна изјава“, наведуваат од иницијативата. „Наместо сочувство и институционална поддршка, гледаме обид за дефокус – од суштината, од болката, од системската корупција што доведе до оваа трагедија.“
„Родителите протестираат зашто го изгубиле највредното нешто – децата. Протестираат за да не се повтори истото. Протестираат за правда. Тоа не е политички напад, туку човечка болка која бара одговорност“, стои понатаму во реакцијата.
Од иницијативата потсетуваат дека токму државата има обврска да се грижи за повредените и нивните семејства:
„Да ги потсетиме властите: граѓаните веќе донирале – преку своите даноци. Не е нивна должност да собираат донации за повредените и нивните семејства. Тоа е обврска на државата. На институциите. На тие што се платени да служат, не да обвинуваат.“
Како посебно неприфатливо го посочуваат и тоа што властите најавуваат инфраструктурни решенија до 2030 година, додека „на Кочани сега му треба поддршка. Конкретна. Финансиска. Психолошка. Правна. А најмногу му треба задоволена правда.“
„Ова не е момент за политички калкулации. Ова е момент за човечност, одговорност и солидарност. Сè друго е бегање од вина и соучесништво во неказнивост“, предупредуваат од иницијативата.
Тие најавуваат дека ќе продолжат со протестите:
„Одиме во Кочани. Оваа сабота, следната, секоја наредна, додека болката не се претвори во правда. Додека овие луѓе не го добијат тоа што системот им го должи. Додека повредените не добијат здравствена помош, додека семејствата не добијат финансиска помош, додека правдата не затропа на вратите на оние кои целата наша историја не горат, гушат, газат и уништуваат.“
Редакција Фронтлајн
