Концерт насловен „ШЛАГ ШЛАГЕРИ – Ко некад у 8“ ќе се одржи вечер во во рамки на фестивалот Скопско лето.
На сцената ќе настапат Оркестарот на „Полифонија“, а изведувачи се Денис Димоски, Оливер Њего, Васко Здравков, Андријана Јаневска, Вера Јанковиќ, Теа Пејиќ, Ана Петановска, Маја Г. Панчева и Александар Тарабунов. Диригент на концертот е Иван Еминовиќ.
-ШЛАГ ШЛАГЕРИ е топол осврт кон фестивалскиот феномен во регионот и градската култура како урбано културно наследство кое континуирано ги обединува генерациите од регионот. Преку презентација на легендарни мелодии од поранешна Југославија настанот симулира патување низ времето и различните трендови на култура низ декадите, соопшти Српскиот културно информативен центар.
Во соопштението се нагласува дека концертот поттикнува зачувување на градското културно творештво преку платформа на вмрежувања помеѓу млади и искусни уметници, класичари и џезери, како и уметници во пензија кои ја унапредија музичката историја. Се додава дека преку ваква дисперзија на изведувачки капацитет и промоција на заедничките вредности, се постигнува целта – повторување, афирмирање и пренесување (на новите генерации) безвременски хитови кои го обединуваат регионот.
Настанот, како што се наведува во соопштението претставува и обележување на значаен јубилеј – 20 години извонредна активност и делување на на Српскиот културно информативен центар Спона од Скопје.
-Српскиот културно информативен центар СПОНА со седиште во Скопје е граѓанско здружение формирано како самостојна невладина, непартиска асоцијација, со цел остварување и усогласување на интересите на припадниците на српска етничка заедница, дејствувајќи на територија на Република Македонија. Фокусот на центарот е придонес во остварувањето на пошироки општествени интереси преку задоволување на потребите најнапред од сферите на еманципација и афирмација на културното наследство, човековите и граѓанските права, но и како мост за поврзување со македонскиот народ и другите етнички заедници во Република Македонија. Во континуитет центарот СПОНА веќе 20 години активно работи и делува со доследност кон своите цели преку бројни реализирани книжевни работилници, панели, семинари, културни катчиња, изложби, рецитали, сесии, курсеви, претстави, фестивали, образовни работилници, издавање на списанија, брошури, книги, видео и аудио записи и др, се вели во соопштението.
Уметничкиот центар Полифонија од Скопје, пак, е организација која од 2003 година до денес функционира и делува во сферите на културните и уметничките случувања, заземајки значајна улога во остварување на бројни видови на проекти поддржани од Министерството за култура и во соработка со скоро сите Национални установи од областа на културата во нашата држава.
-Организирајки оригинални и невообичаени проекти во соработка со меѓународни институции како Гете-институт, Нишвил Џез Фестивал, Канадската Амбасада во Белград, Универзитите на Грац, Сплит и Калгари, Металворк од Торонто и реномирани фестивали во Италија и други, Полифонија се јавува и како главен носител и ко-организатор на културни манифестации во државата и презентација на Македонските уметници надвор, се додава во соопштението.
Специјален гостин од Србија е бардот, оперски пеач и универзитетски професор, Оливер Њего кој е роден во Скопје, каде ја има поминато својата младост и завршено дел од образованието.
На програмата се планирани 20 безвременски песни со оркестарски аранжмани, а меѓу нив се: Ѓорѓе Марјановиќ – Девојко мала и Ко некад у 8, Јадранка Стојаковиќ – Што те нема, Арсен Дедиќ – Девојка из мога краја, Сенка Велетаниќ – Златни дан, Драган Стојниќ – Била је тако лепа, Здравко Чолиќ – Април у Београду, Оливер Мандиќ – Љуљај ме нежно, Ѓорѓе Балашевиќ – Рингишпил, како и дел од македонските шлагери: Зафир Хаџиманов – Како Вардар, Драган Мијалковски – Кажи нешто драга, Маја Оџаклиевска – Сребрени улици.
