Фронтлајн денеска (22 јуни 2025) објави вест со наслов: „Иранците тврдат дека Фордо не претрпе значителна штета, МААЕ соопшти дека нема зголемена радијација надвор од нуклеарните објекти“. Во веста се пренесени информации од домашни (МИА) и меѓународни извори, вклучително и официјално соопштение на Меѓународната агенција за атомска енергија (МААЕ).
Наместо оваа стандардна новинарска содржина да се третира како што прилега – како извештај што ја информира јавноста за важни глобални настани – Петар Богојески, директор на Националната агенција за европски образовни програми и мобилност и функционер во коалициската влада на Христијан Мицкоски, ја искористи како повод за уште еден неоснован, груб и манипулативен напад врз Фронтлајн.мк.
На официјалната Фејсбук страница на Фронтлајн, Богојески коментираше:
„Многу загрижени вие од црвената комуна за Иран? До некни бевте главни амери! Или снема кешарица од УСАИД, па сега се чека на донации од Катар?“
Ова не е изолиран испад. Богојески има долгогодишна практика на агресивни, клеветнички и политички мотивирани напади во јавниот простор, често исполнети со вулгарни навреди, говор на омраза и дезинформации. Неодамна, во изјава за медиумите се обиде да избегне одговорност со изјава дека неговиот профил бил „хакиран“ – што беше пречекано со потсмев. Без чувство за одговорност и самоконтрола, тој набрзо по таа гротескна изјава продолжи со навредливо и насилничко однесување во јавната комуникација.
Како владин функционер и директор на институција поврзана со Европската Унија, ваквиот настап не е само недоличен – туку претставува директна закана за медиумските слободи и довербата во демократските институции.
Со вакво однесување, Богојески не само што го дискредитира својот личен интегритет, туку и угледот на Националната агенција за европски образовни програми и мобилност, а со тоа и на програмата Еразмус+, која е симбол на дијалог, толеранција и европски демократски вредности.
Упатуваме повик до јавноста, институциите и меѓународната заедница:
Ова однесување мора да биде јавно отфрлено и најостро осудено.
Кога владини функционери се впуштаат во клеветнички напади врз медиуми, молкот е соучесништво.
Редакција ФРОНТЛАЈН
