Нашата порака е јасна: Грција не е отворен коридор кон Европа. Подготвени сме тесно да соработуваме со либиските власти за да ги спречиме поаѓањата од местото од каде што тргнуваат. Но, исто така, потребен ни е и унифициран европски одговор, истакна грчкиот премиер Кирјакос Мицотакис во изјава за германскиот весник „Билд“, јави дописничката на МИА од Атина.
За амандманот на Владата со построги мерки за мигрантите и суспензија на разгледувањето на барањата за азил за оние кои нелегално пристигнуваат од северна Африка, Мицотакис објасни дека поради зголемувањето на мигрантските бранови од Либија до Крит, ја донеле оваа „тешка, но апсолутно неопходна одлука“.
– Оваа одлука испраќа јасна порака до мрежите на криумчарите и не остава простор за погрешно толкување: Грција не е отворена транзитна рута. Патувањето е опасно, исходот неизвесен, а парите што им се исплаќаат на криумчарите на крајот се залудни. Нелегалните влезови нема да доведат до законски престој, посочи Мицотакис.
Додаде дека Грција останува посветена на „фер и ефикасна миграциска политика, вклучувајќи ги и законските патишта на миграција“, но и дека сегашната ситуација „бара итна акција“.
– И ова не е само одговорност на Грција, туку е и одговорност на Европа, порача Мицотакис.
Во грчкиот Парламент, се очекува денеска да биде ставен на гласање амандманот доставен од Министерството за миграција и азил на Грција и предвидува суспендирање на поднесувањето барања за азил од лица кои нелегално влегле во Грција со пловно средства што доаѓа од северна Африка и овие лица ќе бидат вратени, без регистрација, во земјата од која дошле или во нивната земја на потекло.
На гласањето му претходеше дискусија во текот на вчерашниот ден, опозициските партии изразија незадоволство и несогласување, а шефот на грчката дипломатија Јоргос Герапетритис посочи дека „постои потенцијална закана“ за Грција и затоа се потребни итни мерки.
Додаде дека според нив, „границите треба да бидат контролирани, но контролирани, со легални мигрантски рути, а не со нелегални рути кои создаваат огромни проблеми“.
Портпаролот на ЕК за внатрешни работи, демократија, правда и владеење на правото Маркус Ламерт, како што вчера објави МИА, коментираше дека мерките на Грција за азилантите мора да се во согласност со законодавството на ЕУ.
