Најмалку тројца цивили беа убиени, а 19 беа повредени во руски напади низ Украина во текот на изминатите 24 часа, објавија регионалните власти на 8 август, пренесува Кијив Индипендент.
Според украинските воздухопловни сили, руските окупатори лансирале 108 дронови за напад од типот Шахед, дронови-мамки и дронови-камикази на ракетен погон преку ноќ.
Противвоздушната одбрана собори 82 дронови, додека 26 погодија 10 локации. Според соопштението, остатоци од пресретнатите дронови паднаа во осум дополнителни области.
Во Запаришката област, двајца цивили беа убиени додека руските сили извршија 545 напади врз 14 градови и села, изјави гувернерот Иван Федоров.
Во Донецката област, 10 цивили беа повредени за време на руските напади, изјави гувернерот Вадим Филашкин.
Пет лица беа повредени во Харкивската област, вклучувајќи жители на Харкив и седум околни населби, според гувернерот Олех Синиехубов.
Едно лице е убиено, а друго е повредено во Херсонската област, каде што руските напади оштетија три станбени згради и 15 куќи, изјави гувернерот Олександр Прокудин. Целите вклучуваа и социјална инфраструктура и станбени области.
Во Сумската област, три лица беа повредени додека руските сили извршија речиси 110 напади врз 47 населени места, објавија локалните власти.
Нападите доаѓаат во време кога Москва продолжува да одбива да се согласи на безусловно примирје и ја ескалира својата зависност од беспилотни летала и ракетна муниција за насочување кон украинската цивилна инфраструктура.
Д. Мишев / Цивил Медиа
