Украинскиот претседател Володимир Зеленски ги повика меѓународните лидери да извршат притисок врз Москва пред патувањето на рускиот претседател Владимир Путин во Кина за состанок на Шангајската организација за соработка (ШОС), јави ДПА.
Зеленски синоќа изјави дека разговарал со индискиот премиер Нарендра Моди, кој треба да се сретне со Путин на самитот во кинескиот град Тјенџин.
Зеленски рече дека очекува Моди да работи во прилог на прекин на огнот во конфликтот меѓу Украина и Русија, што трае повеќе од три и пол години, пренесе ДПА.
Украинскиот лидер повторно рече дека прекинот на огнот е предуслов за почеток на мировните преговори.
Русија, од друга страна, вели дека сака да преговара за траен мир без претходно да го прекине конфликтот.
Зеленски во својата синочешна редовна вечерна видео порака уште еднаш ја изрази својата подготвеност да се сретне со Путин, и покрај обесхрабрувачките сигнали од Москва.
Неговиот преговарач Рустем Умеров одржа разговори во Турција, Обединетите Арапски Емирати, Саудиска Арабија и Катар. Сите тие се подготвени да организираат билатерален состанок, како и Швајцарија, рече Зеленски.
Тој, исто така, најави понатамошни состаноци во Европа следната недела за да се обезбеди „силен одговор“ на Москва, додека ЕУ подготвува 19-та рунда санкции против Русија, пренесе германската агенција.
Путин од денеска присуствува на самитот на ШОС а во среда ќе биде главен гостин на воената парада во Пекинг, потсети ДПА.
