Вклучувањето на Северна Македонија во Механизмот за владеење на правото е силна потврда за европската перспектива на земјата и признание за нејзиниот напредок, рече министерот за европски прашања Орхан Муртезани во обраќањето на состанокот на Советот за општи работи на Европската Унија во Брисел.
Како што истакна Муртезани, Извештајот за владеење на правото 2025 за Северна Македонија потврдува реален напредок, но и дека истовремено остануваат предизвици кои не смеат да се игнорираат.
-Владеењето на правото не е само услов за членство, туку основа врз која се гради довербата меѓу институциите и граѓаните. Реформите во оваа област се од заеднички интерес, бидејќи посилните институции и поголемата доверба во правдата придонесуваат за стабилност и развој не само во Северна Македонија, туку и во целиот регион, подвлече министерот.
Тој потсети на неодамнешното обраќање на претседателката на Европската комисија во Стразбур, дека Европската Унија нема да биде целосна без Западен Балкан и дека проширувањето е стратешки интерес на цела Европа. Дополни и дека Северна Македонија учествува во Советот не како набљудувач, туку како партнер кој активно придонесува во заедничките напори за унапредување на демократијата и владеењето на правото.
-Зајакнувајќи ја правната држава дома, Северна Македонија ја зајакнува и Европската Унија. Овој процес не е само национален приоритет, туку заедничка инвестиција во стабилноста, сигурноста и иднината на целата Европа, порача Муртезани.
Министерот оцени и дека учеството во формалниот Совет за општи работи, втора година по ред, претставува јасна порака дека земјите кандидати се дел од заедничките напори за унапредување на владеењето на правото во цела Европа.
Како што информира Министерството за европски прашања, состанокот се одржа на покана на Данското претседателство со Советот на ЕУ и беше посветен на владеењето на правото. Учесниците се фокусираа на Извештајот на Европската комисија за 2025 година и на состојбите во четири области: судскиот систем, антикорупцискиот рамковен механизам, медиумската слобода и плурализам и институционалните прашања поврзани со контролните механизми.
Ова беше второ учество на министри од земјите-кандидатки на иста маса на формален состанок на ГАК заедно со земјите членки, во рамки на европскиот Механизам за владеење на правото.
