Палестинската милитантна група Хамас денеска изјави дека останува посветена на договорот за прекин на огнот со Израел, вклучително и ветување за предавање на телата на сите свои заложници, Израелци.
Изјавата следеше по острото предупредување од американскиот претседател Доналд Трамп, кој рече дека ако Хамас не го исполни својот дел од договорот и не ги врати телата на сите заложници, ќе го поддржи Израел во продолжувањето на војната.
Хамас тврди дека некои од телата на заложниците останале закопани во тунели кои подоцна биле уништени од Израел и дека е потребна тешка машинерија за нивно извлекување.
Групата, исто така, го критикуваше израелскиот премиер Бенјамин Нетанјаху за повикот за намалување на хуманитарната помош за Газа, велејќи дека тоа е обид за манипулирање со хуманитарните потреби „за политичка добивка“.
Во денешното дополнително соопштение, Хамас ги повика медијаторите да го зголемат протокот на помош во Газа, да го забрзаат отворањето на граничниот премин Рафа со Египет и да го започнат процесот на реконструкција, особено на домовите, болниците и училиштата.
Исто така, повика на чекори за гонење на „оние што извршиле воени злосторства“ против Палестинците.
Планот за прекин на огнот што го презентираше Трамп предвидуваше сите заложници – мртви и живи – да бидат предадени до рокот што истече во понеделникот.
Според договорот, доколку тоа не се случи, Хамас требаше да сподели информации за починатите заложници и да се обиде да ги предаде што е можно поскоро.
Нетанјаху рече дека Израел „нема да прави компромиси“ и побара Хамас да ги исполни своите обврски според договорот за прекин на огнот за враќање на телата на заложниците.
Хамас ги увери Соединетите Држави преку медијатори дека работи на враќање на мртвите заложници.
Хамас им кажа на медијаторите дека некои од телата се наоѓаат во области контролирани од израелските трупи.
Во средата, Израел ги прими телата на уште двајца заложници, кратко откако војската соопшти дека едно од осумте тела што претходно ги предаде не е заложник.
Израел чека враќање на телата на вкупно 28 заложници.
Хамас ги ослободи сите 20 живи израелски заложници во понеделникот. За возврат, Израел ослободи околу 2.000 палестински затвореници и притвореници и ги врати телата на 90 Палестинци во Газа за погреб.
Се очекува Израел да предаде повеќе тела, иако официјалните лица не кажаа колку.
Не е познато дали телата се на Палестинци кои починале во израелски притвор или биле земени од Газа од израелски војници и починале во Израел. Во текот на војната, израелската војска ексхумираше тела како дел од потрагата по останките на заложниците.
Палестински форензички тим кој ги испита останките рече дека некои од телата покажуваат знаци на злоупотреба.
Според Црвениот крст и Палестинското централно биро за статистика, илјадници луѓе се водат како исчезнати.
Дополнително, во врска со мировниот договор, Франција соопшти дека работи со „британски и американски партнери“ за да предложи резолуција на ОН во наредните денови за да се оформи присуството на меѓународни мировни сили во Газа.
Портпаролот на француското Министерство за надворешни работи, Паскал Конфавр, вчера на прес-конференција изјави дека арапските земји „инсистираат“ на добивање мандат од ОН за мировни сили.
-Оваа резолуција би обезбедила рамка за распоредување мисија, во поддршка на… палестинските безбедносни сили, кои проценуваат што ќе им треба и што се способни да направат, рече Конфавр.
Тој додаде дека по одлуката за мандатот, ќе се утврди кои земји ќе бидат вклучени, како и деталите за тоа кој што ќе обезбеди, и дека обезбедувањето помош, реконструкција и безбедност треба да биде централизирано во рамките на ОН.
