Лидерот на СДСМ, д-р Венко Филипче, на денешната прес-конференција испрати порака што ја надминува партиската логика – повика членовите и симпатизерите на партијата во општините каде што СДСМ нема свој кандидат во вториот круг од локалните избори, да гласаат според сопственото убедување и според вредностите што им се блиски.
„Ние нема да навлегуваме, ниту навлеговме, во калкулации или во некакви задкулисни договори. Секој граѓанин, секој член, секој симпатизер има целосно право да одлучи согласно сопственото убедување – според тоа кој кандидат носи вредности блиски до социјалдемократската идеја и до вредностите за чесно владеење, почит, еднаквост и развој“, изјави Филипче.
Со овој став, лидерот на СДСМ испрати порака на политичка зрелост и доверба во граѓанската свест, покажувајќи дека демократијата не се состои во слепа партиска лојалност, туку во слободата на совеста и изборот.
Филипче нагласи дека на втори ноември, во недела, секој глас може да направи разлика, повикувајќи граѓаните да изберат локална власт што ќе биде вистински сервис на народот.
„Гласајте и изберете локална власт која е вистински сервис за граѓаните, за кандидати што нема да ја затворат вратата. После изборите таа врата ќе биде отворена за секого, кога било кој граѓанин ќе има потреба или ќе сака да биде слушнат. Тоа е глас за луѓе кои ги исполнуваат ветувањата и кои посветено ќе работат да живееме во подобри општини и градови“, порача Филипче.
Тој повика на масовна излезност во вториот круг, испраќајќи порака дека граѓаните имаат моќ преку гласањето да го изразат своето незадоволство од власта, но и своите вредности и убедувања.
Филипче нагласи дека власта не понудила решенија за проблемите на граѓаните и покажала „невиден степен на ароганција“.
Во тој контекст, лидерот на СДСМ порача дека гласањето е најсилниот демократски инструмент со кој секој поединец може да направи промена.
„Гласањето е нашиот најмоќен протест против неспособноста и најсилен отпор на апатијата. Во недела сигурен глас може и ќе направи разлика“, рече Филипче.
Со ваквиот повик, претседателот на СДСМ покажа зрелост и доверба во сопствените членови и во демократските принципи, нагласувајќи дека вредностите се поважни од политичките калкулации.
Ј. Ѓ.
