Од опозициската СДСМ реагираат дека растот на цените ја „јаде куповната моќ“ на граѓаните и дека Владата на ВМРО-ДПМНЕ не презема ништо конкретно.
– Последните податоци за инфлацијата потврдуваат дека, спротивно на уверувањата на власта, таа останува висока и ја јаде куповната моќ на граѓаните, се наведува во партиското соопштение.
„Храната и безалкохолните пијалаци поскапеа за 7%, а платите и пензиите не го следат растот на трошоците за живот.“
СДСМ обвинува дека во Буџетот за 2026 година не се предвидени мерки за намалување на цените ниту покачување на минималната плата на 500 евра, како што партијата предлагала.
Од ВМРО-ДПМНЕ возвраќаат дека токму нивното владеење донело стабилност и умерена инфлација.
– Во времето на СДСМ државата имаше двоцифрена инфлација и економска нестабилност. Денес имаме стабилен курс, ниска инфлација и зголемени инвестиции, стои во реакцијата на владејачката партија.
„Доколку граѓаните беа незадоволни, немаше да дадат толкава поддршка на локалните избори“, додаваат од таму.
Од друга страна, најновиот Извештај на Европската комисија за 2025 година потврдува дека инфлацијата е стабилизирана, но предупредува на длабоки структурни проблеми во економијата.
Според извештајот: Инфлацијата во 2024 година изнесувала 3,5%, по пад од 9,4% во 2023 и 14,1% во 2022 година; Реалниот раст на платите до јуни 2025 е 3,8%, додека номиналниот изнесува 12,9%; Јавниот долг достигнал 53,8% од БДП, а дефицитот 4,4%, над планираното ниво; БДП пораснал за 2,8%, поттикнат од јавни инвестиции, но не и од продуктивност.
Брисел оценува дека „растот на платите е побрз од растот на продуктивноста“, што ја одржува инфлацијата над целта. Дополнително, зголемувањето на јавните плати и пензии без соодветно покритие во буџетот создава нови фискални ризици.
Иако официјалните бројки покажуваат забавување на инфлацијата, реалниот животен стандард останува низок. Половина од домаќинствата живеат со месечни приходи под 600 евра, а цените на храната и услугите остануваат најголем товар за буџетот на граѓаните.
Европската комисија забележува дека социјалните трансфери не се усогласени со трошоците за живот, а мерките за сузбивање на неформалната економија не се спроведуваат ефективно.
Економистите предупредуваат дека инфлацијата е само симптом на подлабоки структурни проблеми – слаба индустриска база, ниска продуктивност и зависност од увоз. Според извештајот на ЕК, реформите во јавната администрација и фискалната дисциплина каснат, а реалниот економски раст не е доволен за одржливо подобрување на животниот стандард.
Инфлацијата во Северна Македонија е под контрола на хартија, но не и во кошничката на граѓаните. Политичките препукувања меѓу СДСМ и ВМРО-ДПМНЕ се само одраз на поширока дилема: дали бројките ја прикажуваат реалноста – или само нејзината статистичка сенка.
Дестан Јонузи
