Објавен е првиот трејлер за новиот документарен филм „Melania“, посветен на Меланија Трамп, кој веднаш предизвика лавина реакции на социјалните мрежи. Особено внимание привлече еден краток, но значаен момент од најавата, кој за кратко време стана вирален.
Документарецот ја следи поранешната и повторно актуелна прва дама на САД во деновите што му претходат на инаугурацијата на Доналд Трамп во јануари 2025 година.
Моментот што стана вирален
Трејлерот започнува со сцена од Денот на инаугурацијата. Меланија се појавува во темна, елегантна прилепена тоалета и шешир со широк обод, гледајќи директно во камерата и изговарајќи: „Еве нè повторно.“
Во следната сцена, таа го слуша Доналд Трамп додека го вежба својот говор. „Моето најгордо наследство ќе биде она на миротворец“, вели тој, на што Меланија додава: „Миротворец и обединител.“
Но, сцената што ја обиколи интернет-заедницата е телефонски разговор меѓу брачната двојка. Трамп ја прашува: „Го гледаше ли тоа?“, на што Меланија кратко одговара: „Не.“ Потоа додава: „Ќе го видам на вестите.“
Поделени реакции на социјалните мрежи
Токму овој лежерен и дистанциран одговор предизвика бројни коментари и шеги на платформата X. „Трампови се мем над сите мемиња“, напиша еден корисник, додека друг се пошегува: „Верувам дека Доналд Трамп ќе се кандидира за трет мандат исклучиво како последен обид конечно да ја импресионира Меланија.“
Имаше и коментари од типот: „Се смеев околу еден час. Навистина.“
Од друга страна, дел од публиката изрази искрено воодушевување. „Ова изгледа неверојатно“, напиша еден гледач, додека друг додаде: „Навистина изгледа многу добро. Вие сте олицетворение на класата, госпоѓо прва дамо.“
Што нуди документарецот?
Според официјалниот опис, „Melania“ ветува ексклузивни снимки што прикажуваат клучни состаноци, приватни разговори и досега невидени моменти од животот на првата дама. Гледачите ќе ја следат Меланија додека ги води подготовките за инаугурацијата, се справува со сложената транзиција во Белата куќа и го организира преселувањето на семејството.
Според медиумските информации, Меланија Трамп наводно склучила лиценцен договор со Amazon вреден околу 40 милиони долари, а светската кино-премиера на документарецот е закажана за 30 јануари 2026 година.
Редакција Фронтлајн
