Претседателот на САД, Доналд Трамп, на 18 декември го потпиша законот за трошоци за одбрана од 900 милијарди долари, одобрувајќи сеопфатен пакет кој вклучува 800 милиони долари воена помош за Украина, пренесува Кијив Индипендент.
„Законот ќе му овозможи на Министерството за војна да ја спроведе мојата агенда „Мир преку сила“, да ја заштити татковината од домашни и странски закани и да ја зајакне базата на одбранбена индустрија“, рече Трамп во соопштение објавено од Белата куќа.
Законот беше одобрен од Сенатот на САД на 17 декември со двопартиски гласови од 77 наспроти 20, откако минатата недела беше усвоен од Претставничкиот дом со 312 наспроти 112 гласови.
Според законот, Украина треба да добива 400 милиони долари годишно во фискалните години 2026 и 2027 година преку Иницијативата за безбедносна помош на Украина (USAI), програма водена од Пентагон која финансира договори за оружје со американски одбранбени компании.
Исто така, предлогот бара Министерството за одбрана да го извести Конгресот во рок од 48 часа од секоја одлука за ограничување на споделувањето разузнавачки информации со Украина, според амбасадорката на Украина во САД, Олха Стефанишина.
Освен директното финансирање за Кијив, законот вклучува и одредби што влијаат на воената позиција на САД во Европа.
Законодавството му забранува на Пентагон да го намали бројот на војници „трајно стационирани или распоредени“ во Европа под 76.000 подолго од 45 дена.
Дополнително, ги зголемува платите за припадниците на вооружените сили, издвојува повеќе средства за воздушниот одбранбен штит „Златна купола“, ја зајакнува воената позиција во Индо-пацифичкиот регион и овластува распоредување на активни војници на границата меѓу САД и Мексико.
Законот, исто така, овластува 175 милиони долари за Балтичката безбедносна иницијатива, за поддршка на одбранбените капацитети на Латвија, Литванија и Естонија.
Сумата доделена на Украина од страна на Конгресот претставува само мал дел од вкупната воена помош што САД ја обезбедија од почетокот на целосната инвазија, која изнесуваше 67 милијарди долари до почетокот на мандатот на Трамп.
Д. Мишев / Цивил Медиа
