Неквалитетна услуга, измени на условите од претплатнички договор, високи сметки и раскинување договори со наплата на казнени пенали се најчестите причини поради кои граѓаните лани се обратиле до Агенцијата за електронски комуникации (АЕК) за решавање спорови. Годинава до АЕК се поднесени 346 барања, наспроти 363 во 2024 година, информираат од регулаторното тело.
Од вкупниот број решенија, 45 се усвоени, 14 делумно усвоени, 40 предмети се затворени по интервенција на операторите, а 109 се одбиени. Дел од барањата биле непотполни, повторно поднесени или АЕК не била надлежна за нив.
Од АЕК оценуваат дека граѓаните сè почесто ги користат механизмите за заштита што ги обезбедува регулаторот. Македонија, според рангирањето на порталот connect.de, е позиционирана на второ место во Европа по квалитет на мобилните мрежи.
Како клучни новини за пазарот се најавуваат влезот на трет мрежен оператор на почетокот на 2026 година и ставањето во функција на телекомуникациската кула на Водно, која треба да биде пуштена најдоцна до 31 јануари. Според АЕК, кулата ќе придонесе за подобра електромагнетна компатибилност и зголемена безбедност во радиокомуникациските служби.
Регулаторот оценува дека 2025 година е позитивна за развојот на пазарот на електронски комуникации. Операторите веќе обезбедуваат просечна 5G-брзина од околу 340 Mbps во градовите и околу 120 Mbps на патиштата, со што таргетите од Националниот оперативен бродбенд план за 2029 година се веќе постигнати.
Во државата моментално работат два мрежни оператори – Македонски Телеком и А1 Македонија, како и неколку виртуелни оператори. Во 2026 година приходите на АЕК се планирани на 636,7 милиони денари, најмногу од надоместоци за користење радиофреквенции.
Заклучно со вториот квартал, во Македонија се регистрирани околу 1,95 милиони мобилни претплатници, 457 илјади фиксни линии, 549 илјади корисници на широкопојасен интернет и 441 илјада претплатници на ТВ-услуги.
