Денес е тешко да се замисли Џон Кјузак без улогата на Лојд Доблер – симпатичниот аутсајдер од култната романтична комедија „Say Anything“ од 1989 година. Но малку недостасувало таа приказна никогаш да не заживее на големото платно, пишува Index.hr.
Кјузак откри дека улогата ја прифатил дури по сериозно преиспитување – и тоа под јасен услов. На неодамнешна проекција на филмот во њујоршкиот „Kings Theatre“, актерот раскажа дека сценариото му се допаднало, но истовремено му делувало премногу „филмски“.
„Едноставно мислев – луѓето така не зборуваат“, признал Кјузак. Тој почувствувал дека младите ликови во сценариото зборуваат и се однесуваат на начин кој нема многу врска со реалноста. Затоа му рекол на режисерот Камерон Кроу дека ќе ја прифати улогата само ако му биде дозволено заедно да го доработат ликот и одредени делови од дијалогот.
Иако очекувал одбивање, Кроу прифатил без двоумење.
Кјузак објаснува дека му било важно Лојд Доблер да не биде само симпатичен оптимист без длабочина. „Тој беше добар и позитивен, но немаше потемна страна. Јас сакав да се види дека тој свесно избрал да биде таков“, изјавил актерот. Токму таа свесна одлука, според него, го направила ликот поавтентичен и поинтересен.
