САД повлекуваат персонал од клучните воени бази на Блискиот Исток, пишува „Скај њуз“ и потсетува дека САД претходно им советувале на персоналот да ја напушти клучната воена база во Катар.
Одлуката за повлекување на персоналот од базите на Блискиот Исток, наведува „Скај њуз“, е мерка на претпазливост со оглед на зголемените тензии по протестите во Иран и по изјавата на иранскиот функционер дека Техеран ќе ги гаѓа американските воени бази во регионот како одмазда за какви било напади од страна на Вашингтон.
САД го повлекоа својот персонал од Иран во воените бази во регионот и по 12-дневната војна во јуни минатата година.
Британските медиуми потсетуваат дека САД имаат воени бази во Бахреин, каде што се наоѓа Петтата флота на американската морнарица и чија област на одговорност ги вклучува Заливот, Црвеното Море, Арапското Море и делови од Индискиот Океан.
Во Катар се наоѓа воздухопловната база Ал Удеид, со површина од 24 хектари, во пустината надвор од главниот град Доха, каде што се наоѓа седиштето на Централната команда на САД, која ги раководи американските воени операции во огромен дел од територијата што се протега од Египет на запад до Казахстан на исток. Базата во Катар исто така е најголемата американска база на Блискиот Исток со речиси 10.000 војници.
САД имаат и бази во Кувајт, каде што се наоѓаат неколку расфрлани воени инсталации, вклучувајќи ги кампот Арифјан, истурен штаб на Централната команда на САД, и воздухопловната база Али Ал Салем, приближно 40 километри од ирачката граница попозната како Карпата.
Во Обединетите Арапски Емирати е воздухопловната база Ал Дафра, која се наоѓа јужно од главниот град Абу Даби и ја дели со воздухопловните сили на ОАЕ, која се смета за клучен центар за воздухопловните сили на САД, кои поддржуваат клучни мисии против Исламската држава, како и извидувачки мисии во целиот регион. Пристаништето Џебел Али во Дубаи, иако не е формална воена база, е најголемото пристаниште на американската морнарица на Блискиот Исток и редовно е домаќин на американски носачи на авиони и други бродови.
САД во Ирак ја имаат воздухопловната база Аин Ал Асад во западната покраина Анбар, која ги поддржува ирачките безбедносни сили и придонесува за мисијата на НАТО, вели агенцијата и потсетува дека иранските ракетни напади во 2020 година ја насочија базата како одмазда за убиството на иранскиот генерал Касем Солејмани од страна на САД.
Во Саудиска Арабија има база со 2.321 американски војници, кои работат во координација со саудиската влада обезбедувајќи капацитети за воздушна и ракетна одбрана и поддржувајќи ги операциите на американските воени авиони, од кои некои се стационирани 60-ина километри јужно од Ријад, во воздухопловната база Принц Султан, која ги поддржува средствата за воздушна одбрана на американската војска.
Во Јордан има воздухопловна база во Азрак, 100 километри североисточно од главниот град Аман, каде што се наоѓа 332. експедициско крило на Централните воздухопловни сили на САД, кое е ангажирано во мисии во целиот Левант.
Турција и САД заеднички ја управуваат воздухопловната база Инџирлик во јужната покраина Адана, во која се сместени и американски нуклеарни бојни глави и се користи за поддршка на меѓународната коалиција, која се бори против Исламската држава во Сирија и Ирак.Во неа престојуваат 1.465 американски воени лица стационирани во Турција.
