Претседателот на СДА Македонија, Џелал Хоџиќ, во анализа за порталот „Локално“ предупредува дека Северна Македонија се наоѓа во длабока геополитичка и економска изолација, како резултат на, како што оценува, погрешната и неодговорна надворешна политика на актуелната власт.
„Денес за нас никој не зборува ниту во ЕУ, ниту во САД. Едноставно креваат раце од нашата држава, затоа што Македонија се одлучи на самоубиствена изолација“, вели Хоџиќ за „Локално“.
Според него, стратешките цели на државата се јасни уште од независноста – демократија, економски развој и членство во НАТО и ЕУ – но актуелната власт, наместо да го заокружи европскиот пат, свесно ги заладува односите со Европската унија.
„Имаме Влада која создава перцепција дека Македонија е жртва на заговор од ЕУ, а притоа гради регионални партнерства со авторитарни лидери како Орбан и Вучиќ, кои на целиот свет му се познати како прокси на Русија“, оценува Хоџиќ.
Тој нагласува дека Македонија нема потреба да бира меѓу САД и ЕУ, туку дека историски имала „кредит“ за политика „и САД и ЕУ“, кој сега се троши со, како што вели, политиката на „новото нормално“.
„Никој од нас не бара политика ‘или САД или ЕУ’. Напротив, поради многу компромиси во минатото, имавме комотна позиција за ‘и САД и ЕУ’. Со оваа неодговорна политика, фактурата ќе ја платат граѓаните, а не владејачката елита“, предупредува тој.
Во анализата за „Локално“, Хоџиќ потсетува дека и САД и ЕУ имаат идентични очекувања од Македонија – намалување на руското и кинеското влијание и заокружување на европскиот процес преку уставни измени.
Како дополнителен аларм, тој ја посочува економската состојба во земјата, која, според него, е полоша од таа во повеќето држави од регионот.
„Денес во Скопје се живее полошо отколку во Сараево, Приштина, Тирана или Подгорица. Тоа е цената на долгогодишната изолација – прво поради спорот со Грција, а сега и поради спорот со Бугарија“, вели Хоџиќ.
Тој смета дека Македонија не може да „седи на две столчиња“, модел кој, според него, веќе не функционира ниту за Србија, која, како што наведува, плаќа цена за долгогодишното балансирање меѓу Западот и Русија.
„Ниту можеме да седиме на две столчиња, ниту ароганцијата и ставањето на проблемите под тепих можат да донесат подобро утре“, оценува претседателот на СДА Македонија.
Хоџиќ е дециден дека најголемата закана за државата денес не е безбедносна, туку економска.
„Нашата најголема закана е економското заостанување и самоизолацијата. Таа во иднина може да произведе и сериозни безбедносни ризици“, предупредува тој.
Во заклучокот на анализата за „Локално“, Хоџиќ порачува дека единствениот рационален избор за Северна Македонија е јасно позиционирање на страната на Западот – Вашингтон, Брисел, Берлин и Лондон – и итно деблокирање на европскиот пат, бидејќи, како што вели, секоја година надвор од ЕУ значи директна штета за граѓаните и државата.
