Претседателот на Соединетите Американски Држави, Доналд Трамп, вчера потпиша извршна наредба со која се укинува „казнената“ тарифа од 25 проценти за целиот увоз од Индија, воведена поради купувањето руска нафта од страна на Индија, соопшти Белата куќа.
Одлуката дојде откако Трамп претходно оваа недела објави дека постигнал трговски договор со Индија, според кој американските тарифи за индиските стоки се намалени од 50 на 18 проценти, во замена за суспендирање на увозот на руска нафта од страна на Индија и намалување на трговските бариери.
Индија е во голема мера зависна од увозот на енергија и задоволува околу 90 проценти од своите потреби за нафта од странство.
Купувањето поевтина руска нафта му овозможи на Њу Делхи да ги намали трошоците за увоз откако Москва ја нападна Украина во 2022 година, а западните земји воведоа санкции врз рускиот енергетски сектор.
Индија неодамна почна да ги забавува купувањата на руска нафта.
Увозот во јануари изнесуваше околу 1,2 милиони барели дневно, додека се проценува дека ќе падне на околу еден милион барели дневно во февруари и на околу 800.000 барели дневно во март.
Договорот со Индија е дел од пошироката трговска стратегија на администрацијата на Трамп, која има за цел да ја намали зависноста на глобалниот пазар од руската енергија и да ги зајакне билатералните трговски односи со клучните партнери.
И Европа го засилува притисокот врз руската нафта што минува низ нејзините води, со цел да ја ограничи способноста на Москва да ја финансира агресијата врз Украина, додека руски функционери и бизнисмени стравуваат дека временскиот прозорец за постигнување мировен договор се стеснува, пред економската состојба дополнително да се влоши.
Европската унија размислува за воведување целосна забрана на поморските услуги неопходни за транспорт на руската нафта, како што се осигурувањето и превозот, како дел од нов пакет санкции со кој би се одбележале четири години од руската војна, пишува Washington Post.
Приходите на Русија од нафта во јануари паднале за 50 проценти во однос на истиот месец минатата година, по новите остри санкции што американското Министерство за финансии во октомври им ги воведе на нафтените компании Роснефт и Лукоил.
Поради санкциите, Москва е принудена да нуди попусти поголеми од 20 долари по барел. Во комбинација со очигледната подготвеност на Индија да ја намали набавката на руска нафта и да го зголеми увозот од САД, а потенцијално и од Венецуела, овие мерки дополнително ги оптоваруваат ресурсите потребни за финансирање на војната.
