18-годишно лице е именувано како осомничено за пукањето во канадската провинција Британска Колумбија, во кое загинаа осум лица, а повеќе од 25 беа повредени, пренесува Би-Би-Си.
Полицијата соопшти дека Џеси Ван Рутселаар бил пронајден мртов на местото на настанот од прострелна рана за која се верува дека сам си ја нанел. Мотивот за нападот засега не е познат.
Шест лица биле убиени во средното училиште „Тамблер Риџ“, додека уште две жртви – 39-годишна жена и 11-годишно момче, мајка и полубрат на осомничениот – биле пронајдени мртви во семејниот дом во близина. Полицијата наведе дека пукањето во домот се случило прво, по што напаѓачот се упатил кон училиштето.
Меѓу жртвите во училиштето се 39-годишна наставничка, три ученички на возраст од 12 години, како и двајца ученици – едниот на 12, другиот на 13 години.
Властите соопштија дека не се верува оти во нападот биле вклучени други лица.
Заменик-комесарот на Кралската канадска коњичка полиција (RCMP), Двејн Мекдоналд, изјави дека осомничениот бил роден како машко лице и пред околу шест години започнал процес на родова транзиција во жена.
Полицијата претходно интервенирала повеќепати во семејниот дом на осомничениот во изминатите години, дел од повиците биле поврзани со состојби на ментално здравје. Премиерот на Британска Колумбија, Дејвид Иби, изјави дека властите ќе побараат информации од здравствениот систем за евентуални претходни контакти.
Осомничениот порано поседувал валидна дозвола за оружје, која во меѓувреме истекла. На местото на настанот биле пронајдени две огнени оружја – пушка и модифициран пиштол. Полицијата соопшти дека сè уште се утврдува точната улога на секое од оружјата во нападот.
Полицијата добила пријава за активен напаѓач во училиштето околу 13:30 часот по локално време во вторникот. Патролите пристигнале за две минути, слушнале пукање и веднаш влегле во објектот. За кратко време го лоцирале напаѓачот, кој веќе бил мртов.
Две повредени лица биле пренесени со хеликоптер во болница и сè уште се хоспитализирани.
Градот Тамблер Риџ има околу 2.400 жители, а средното училиште брои 160 ученици од седмо до дванаесетто одделение.
Канадскиот премиер Марк Карни изјави дека учениците и наставниците биле сведоци на „невидена суровост“ и додаде дека некои од повредените и натаму „се борат за живот“.
Градоначалникот на Тамблер Риџ, Дарил Краковка, емотивно изјави дека заедницата е „едно големо семејство“ и повика граѓаните да си дадат меѓусебна поддршка во тешките денови.
