Реконструираната обиколница во Крива Паланка е пуштена во употреба, а Владата продолжува со реализација на капитални инвестиции во источниот дел од државата, изјави премиерот Христијан Мицкоски, соопшти Владата.
Мицкоски посочи дека ваквите проекти претставуваат „додадена вредност во животот на граѓаните“ и „додадена вредност за македонската економија“, нагласувајќи дека во периодот што следува во Крива Паланка и во овој регион ќе се реализираат инвестиции вредни неколку стотици милиони евра.
„Многу е важно дека во периодот којшто следува овде во Крива Паланка и во овој дел од Македонија ќе поминат неколку стотици милиони евра инвестиции, инвестиции коишто ќе ја поврзат Македонија со коридорот 8 со соседите, а Крива Паланка е влезна точка на делот од коридорот 8 во Македонија“, изјави Мицкоски.
Тој прецизираше дека станува збор за третата фаза од железничката пруга, чија реализација треба да започне, како и за забрзување на втората фаза. Паралелно, како што рече, се работи и на патната инфраструктура, вклучително и на нови делници што треба да го заобиколат влезот во Куманово за патниците кои се движат кон исток, односно кон Крива Паланка и кон источниот сосед.
Мицкоски изрази очекување дека вкупните инвестиции ќе придонесат Крива Паланка да стане „богат, пристоен град“ во кој граѓаните ќе бидат задоволни и ќе се создадат услови за враќање на дел од оние што ја напуштиле државата.
„Луѓето коишто поради оправдани причини ја напуштиле Македонија, ги напуштиле своите домови гледаат сега дека таму каде што отишле, посебно во делот Западна Европа, состојбата не е таква каква што очекувале. Мислам дека со вакви инвестиции ќе претставуваат мотив и ќе можеме да ги вратиме луѓето дома и тука да си ја развиваме нашата македонска економија“, рече тој.
Премиерот нагласи дека Владата останува фокусирана на капиталните инвестиции и на поврзувањето преку коридорите 8 и 10, посочувајќи дека патничкото, железничкото и енергетското поврзување се приоритети на Владата.
„Македонија е држава којашто е практично раскрсница на два многу важни европски коридори, коридорот 8 и коридорот 10. Патничкото поврзување, железничкото поврзување па и енергетското ако сакате претставуваат приоритет на оваа Влада“, изјави Мицкоски.
Тој додаде дека очекува проектите за кои Владата говорела во изминатите две години од мандатот наскоро да бидат реализирани.
