Екипажот на мисијата Артемис II се враќа кон Земјата откако успешно го заврши прелетот околу Месечината, поставувајќи нов рекорд со најголемо оддалечување на луѓе во вселената досега.
Контролата на мисијата на НАСА во Хјустон повторно воспостави контакт со астронаутите по очекуваниот прекин од околу 40 минути, додека нивното летало минуваше зад Месечината.
Четворицата астронаути се на пат кон дома по успешно изведен прелет кој ги однесе подалеку од Земјата од било кои луѓе во историјата.
Овој пат, познат како „слободна повратна траекторија“, користи гравитација од Земјата и Месечината за да го насочи леталото назад, со минимална потрошувачка на гориво. Траекторијата има форма на небесна осумка и автоматски ги насочува астронаутите назад кон Земјата откако ќе излезат од задната страна на Месечината.
Привремениот прекин на комуникацијата бил очекуван, бидејќи леталото било надвор од директната линија на сигнал со Земјата.
„Прекрасно е повторно да ја слушнеме Земјата“, изјави астронаутката Кристина Кох по повторното воспоставување на контактот.
„Секогаш ќе ја избереме Земјата, секогаш ќе се избираме едни со други.“
По враќањето на сигналот, екипажот набљудувал и целосно затемнување на Сонцето, при што Месечината накратко го блокирала Сонцето и ја открила неговата бледа надворешна атмосфера.
„Ова изгледа како научна фантастика. Нереално е“, изјави пилотот Виктор Гловер.
Претходно, тимот го надмина рекордот поставен од мисијата Аполо 13, достигнувајќи максимална оддалеченост од околу 406.778 километри од Земјата.
Американскиот претседател Доналд Трамп им честитал на астронаутите, нарекувајќи ги „модерни пионери“ и истакнувајќи дека „создале историја“.
Астронаутите Рид Вајсман, Виктор Гловер, Кристина Кох и Џереми Хансен поминале часови испраќајќи детални набљудувања на површината на Месечината.
„Неверојатно е што може да се види со голо око“, изјавил Хансен, додавајќи дека новите генерации треба да го надминат овој рекорд.
Тие го опишале и т.н. „терминатор“ – границата меѓу денот и ноќта на Месечината.
„Во моментов изгледа спектакуларно, со многу груб релјеф“, објаснил Гловер.
Водечката научничка на мисијата, Келси Јанг, ги пофалила нивните описи, нагласувајќи дека човечката перспектива е незаменлива.
Кох ги опишала кратерите како „абажур со мали дупчиња низ кои пробива светлина“, истакнувајќи колку се светли во споредба со остатокот од Месечината.
Пред да започнат со работата, астронаутите побарале дозвола да именуваат два нови кратери – „Integrity“ (по името на нивната капсула) и „Carroll“, во чест на починатата сопруга на командантот Вајсман.
Вајсман се расплакал додека барањето било испратено до контролата на мисијата, а целиот екипаж се прегрнал во емотивен момент.
Мисијата Артемис II е прва мисија со астронаути кон Месечината по Аполо 17 во 1972 година.
Таа е подготовка за следната мисија, Артемис III, кога астронаутите ќе вежбаат спојување со лендер, додека вистинското слетување на Месечината е планирано за мисијата Артемис IV во 2028 година.
ИСТОРИСКИ МОМЕНТ: Екипажот на Артемис II го собори рекордот на Аполо 13
