Традиционалната вечера на дописниците од Белата куќа во Вашингтон се претвори во сцена на хаос и паника откако синоќа околу 20:35 часот по локално време беа истрелани неколку куршуми. Американскиот претседател Доналд Трамп е неповреден и веднаш бил евакуиран на безбедно во Белата куќа, додека Тајната служба брзо го совладала и привела осомничениот напаѓач.
Инцидентот се случи во свечената сала додека присутните, меѓу кои високи државни функционери и новинари, во паника се криеле под масите. Според изјавата на Трамп, еден припадник на Тајната служба бил застрелан од непосредна близина, но животот му го спасил заштитниот елек. Потпретседателот Џеј Ди Венс исто така бил итно извлечен од салата за време на паниката на сцената.
Осомничениот идентификуван, цел биле функционери на администрацијата
Американските медиуми го идентификуваа напаѓачот како Коул Томас Ален (31) од Торанс, Калифорнија. Според извори на CBS News, Ален им изјавил на властите дека негова цел биле функционери од администрацијата на Трамп. ФБИ и полицијата веќе вршат претрес на неговата адреса во Калифорнија, а се очекува тој официјално да биде изведен пред суд во понеделник.
Здружението на дописници од Белата куќа соопшти дека вечерата ќе биде одложена за друг термин. Самиот Трамп по инцидентот објави снимка на која се гледа како напаѓачот поминува покрај обезбедувањето, додавајќи дека „се борел како ѓавол“ за да остане на настанот и покрај опасноста.
Светските лидери со осуда за нападот
Веста за пукањето предизвика брзи реакции од светските метрополи. Британскиот премиер Кир Стармер изјави дека е шокиран од сцените во Вашингтон и нагласи дека секој напад врз демократските институции и слободата на медиумите мора најостро да се осуди. Слични пораки на поддршка и олеснување што претседателското семејство е на безбедно испратија и канадскиот премиер Марк Карни, австралискиот премиер Ентони Албанезе и високата претставничка на ЕУ, Каја Калас.
Индискиот премиер Нарендра Моди, пакистанскиот премиер Шехбаз Шариф и мексиканската претседателка Клаудија Шеинбаум исто така упатија желби за брзо закрепнување на повредениот агент и порачаа дека на политичкото насилство не му е место во демократијата.
Ј. Ѓ.
